Xarici siyasət

Ana səhifə

Xarici siyasət

Səfir: Azərbaycan ABŞ-dan minatəmizləmə texnologiyaları sahəsində dəstək gözləyir

12 avqust 2026 15:04 (UTC +04:00)

Azərbaycan minatəmizləmə texnologiyaları və üsullarının axtarışını davam etdirir və bu sahədə ABŞ-ın dəstəyinə ümid edir.

Bu barədə Azərbaycanın ABŞ-dakı səfiri Xəzər İbrahim “Axios”a müsahibəsində bildirib.

Səfir Azərbaycanın mina probleminin miqyasının böyük olduğunu vurğulayıb.

“Adambaşına düşən göstəriciyə baxsaq, Azərbaycan dünyada minalarla ən çox çirklənmiş ölkələrdən biridir”, - diplomat qeyd edib.

Bakı ABŞ-la mina təmizlənməsində əməkdaşlığa ümid edir

Xəzər İbrahim dünyanın mina təmizlənməsi sahəsində əldə etdiyi texnoloji imkanların Azərbaycana da kömək edə biləcəyini bildirib: “Dünyada çox sayda texnoloji yenilik var ki, bunlar kömək edə bilər. Ümid edirik ki, bu məsələ üzrə ABŞ-la da əməkdaşlıq edə biləcəyik”.

Səfirin sözlərinə görə, mina təmizlənməsi bahalı, vaxt aparan və təhlükəli prosesdir. Bu səbəbdən müasir texnologiyaların tətbiqi Azərbaycanın mina probleminin daha sürətli və təhlükəsiz şəkildə həllinə mühüm töhfə verə bilər.

Xəritələşdirmə əsas məsələlərdən biridir

Xəzər İbrahim minalanmış ərazilərin düzgün müəyyənləşdirilməsinin xüsusi əhəmiyyət daşıdığını diqqətə çatdırıb.

ABŞ-Azərbaycan əməkdaşlığı genişlənir

Xəzər İbrahim ABŞ administrasiyası ilə əməkdaşlığın praktiki xarakter daşıdığını vurğulayıb: “Hazırkı ABŞ administrasiyasının yaxşı cəhəti ondan ibarətdir ki, nə barədə razılığa gəlirsinizsə, dərhal onun üzərində işləməyə başlayırsınız”.

“Axios” yazır ki, Sovet İttifaqının dağılması və Azərbaycanla Ermənistan arasında uzun illər davam edən münaqişə regionda böyük həcmdə partlamamış hərbi sursatların qalmasına səbəb olub. Bu sursatlar insanların yaralanması və ya həlak olması ilə yanaşı, sənaye və iqtisadi fəaliyyət üçün də ciddi maneə yaradır. Nəşr qeyd edir ki, Marshall Legacy Institute 2005-ci ildən etibarən Azərbaycan Respublikasının Minatəmizləmə Agentliyinə (ANAMA) 90-dan çox mina aşkarlayan it bağışlayıb. Agentlik və beynəlxalq tərəfdaşlar Azərbaycanın azad edilmiş ərazilərində mina və partlamamış hərbi sursatların təmizlənməsi istiqamətində fəaliyyət göstərirlər. Məlumata görə, Azərbaycan ABŞ-la sülh razılaşmasından sonra süni intellektdən enerjiyə qədər müxtəlif sahələrdə daha sıx əməkdaşlıq əlaqələri qurmağa çalışır.