Xarici siyasət

Ana səhifə

Xarici siyasət

Cənubi Koreya səfiri: "Azərbaycan vacib tərəfdaşdır"

03 iyul 2018 15:36 (UTC +04:00)

"Azərbaycan Koreya üçün vacib və əsas tərəfdaşdır".

APA-nın xəbərinə görə, bunu Koreya Respublikasının Azərbaycandakı səfiri Kim Çanq Qyu bu gün keçirilən ictimai-siyasi diplomatiya seminarında deyib.

Səfir bildirib ki, Azərbaycan və C. Koreya arasında 1992-ci ildən ikitərəfli əlaqələr mövcuddur və 12 il ərzində 3 sammit baş tutub.

İki ölkə arasında qarşılıqlı səfərlərin əlaqələri gücləndirdiyini vurğulayan səfirin sözlərinə görə, ölkələr arasında mövcud olan davamlı siyasi dialoq əhəmiyyətli nümunədir: “Beynəlxalq aləmdə bir-birimizə həmişə dəstək ifadə edirik. Son illər ölkələrimiz arasında iqtisadi əməkdaşlıqda artımın şahidi oluruq. Ölkələr arasındakı ticarət dövriyyəsi tədricən artaraq 2014-cü ildə 270 milyon dollara çatıb. Mədəniyyət ikitərəfli əməkdaşlıqda çox mühümdür, çünki ortaq mədəniyyəti bölüşürük. Koreya-Azərbaycan Mədəni Əməkdaşlıq Assosiasiyası iki ölkə arasında mədəni əlaqələrin inkişafını təşviq edir. Bu gün 24 koreyalı tələbə Azərbaycan təhsil müəssisələrində təhsil alır, 80 azərbaycanlı tələbə isə Koreyada oxuyur. Koreya universitetində Azərbaycan dili mərkəzi fəaliyyət göstərir və Azərbaycanın 4 universitetində isə Koreya dili tədris olunur".

İldən-ilə turizm əlaqələrinin genişləndiyini söyləyən səfir qeyd edib ki, viza sadələşdirilməsi sayəsində bu il Azərbaycana gələn koreyalı turistlərin sayı 10 min nəfərə çatıb: “Növbəti illər üçün bura gələn turistlərin sayının ikiqat yüksəlməsinə ümid edirəm".