Daxili siyasət

Ana səhifə

Daxili siyasət

İqbal Ağazadə: “İqtidar-müxalifət dialoqu baş tutarsa, partiyamızın xüsusi təklifləri olacaq”

01 avqust 2012 09:21 (UTC +04:00)

“Hesab edirəm ki, siyasətin predmeti olan bütün məsələlər ümummillidir”

Bakı. Ramil Məmmədli-APA. “Cəmiyyətin həll edə bilmədiyi bütün məsələlər iqtidar-müxalifət dialoqunda masa üzərinə çıxarılmalıdır”.

Bu açıqlamanı APA-ya Ümid Partiyasının sədri İqbal Ağazadə verib. O deyib ki, dialoq baş tutarsa, görüşdə partiyanın xüsusi təklifləri olacaq: “Hesab edirəm ki, siyasətin predmeti olan bütün məsələlər ümummillidir. Nədənsə, ümummilli məsələ deyəndə hamı Qarabağ problemini nəzərdə tutur”.

İ. Ağazadə bildirib ki, dialoqda müzakirəyə çıxarılacaq məsələləri kateqoriyalara bölmək düzgün deyil: “Müzakirə ediləcək məsələlərə qeyri-ümummilli və ya ümummilli məsələ kimi yanaşmaq dialoq təklifinin reallaşmasına müsbət təsir göstərməyə bilər”.

Qeyd edək ki, bir müddət əvvəl Yeni Azərbaycan Partiyasının sədr müavini, icra katibi Əli Əhmədov ümummilli məsələlərdə müxalifətlə dialoqa hazır olduqlarını bildirib.