Afrika

Afrika

Yaxın günlərdə Qara dənizdə Bakı-Supsa kəməri ilə nəql olunan Azərbaycan neftinin tankerlərə yüklənməsinə başlanacaq

06 noyabr 2008 10:32 (UTC +04:00)

Bakı. Nicat Mustafayev – APA-Economics. Bakı-Supsa neft kəməri ilə Gürcüstanın Qara dəniz sahilinə nəql olunan Azərbaycan neftinin ötürülməsi prosesi bərpa olunub. Bu barədə «APA-Economics»ə Azərbaycan Beynəlxalq Əməliyyat Şirkətinin (ABƏŞ) operatoru olan «BP-Azerbaijan» şirkətinin ictimaiyyətlə əlaqələr üzrə meneceri Tamam Bayatlı məlumat verib.
T.Bayatlının sözlərinə görə, hələlik neft kəmərlə az həcmdə nəql olunur və sonradan nəqletmə həcmi artırılacaq: «Bakı-Supsa kəməri ilə neftin nəqli şirkət tərəfindən kəmərdə anomaliya müəyyən edildikdən sonra, 2006-cı ilin noyabrında dayandırılıb. Lakin bu ilin avqust ayında nəqletmə bərpa olundu. Həmin ay Gürcüstanda baş verən hadisələrlə bağlı bu kəmərlə neftin nəqlini yenidən dayandırıldı. Hazırda isə Bakı-Supsa kəməri ilə Azərbaycan neftinin nəqli bərpa olunub».
T.Bayatlı onu da qeyd edib ki, kəmər vasitəsi ilə yalnız ABƏŞ-in həsil etdiyi neft nəql olunur: «Yaxın 4-5 gündən sonra isə Supsa limanından ilk tankerə neft vurulacaq».
Qeyd edək ki, Bakı-Supsa istifadəyə veriləndən (1999-cu il) 2005-ci ilin sonunadək kəmərlə 295 mln. barel neft nəql olunub, 2006-cı ilin 10 ayı ərzində isə 5,6 mln. ton neft ötürülüb.
Xatırladaq ki, diametri 530 mm, uzunluğu 837 km (o cümlədən, Azərbaycan hissəsi - 443 km) olan Bakı-Supsa neft kəməri 1999-cu ilin aprel ayında istifadəyə verilib. Kəmərin ilkin gündəlik buraxılış gücü 117 min barel olub. Lakin sonradan nasos stansiyalarında iki dəfə aparılan modernləşmə işləri nəticəsində buraxılış gücü 145 min barelədək artırılıb ki, bu da ildə 7 mln. ton neftin nəql olunmasına imkan verir.