Amerika

Amerika

ABŞ Erməni Milli Komitəsinin sabiq rəhbərinin qızı məşhur reketlə ailə qurub

15 iyul 2008 08:02 (UTC +04:00)

APA-nın ABŞ bürosunun xəbərinə görə, M. Topalyanın qızı Danielle bu il fevralın 19-da Nyu-Yorkun kriminal aləmində “Öküz” ləqəbi ilə tanınan məşhur reket Karmin Anyello ilə nikaha daxil olub. Bu barədə “The New York Post” qəzeti məlumat yayıb. Qəzetin Nyu-York ştatının məhkəməsindən əldə etdiyi sənədlərə əsasən cütlük Ohayo ştatının federal həbsxanasında tanış olub. Həmin vaxt K. Anyello reketçilik və vergidən yayınma maddələri ilə 9 illik həbs cəzası çəkirmiş. Danielle isə eyni həbsxanada terrorçuluq maddəsi ilə cəza çəkən atasına baş çəkməyə gəlirmiş. “The New York Post” qəzeti Murad Topalyanı erməni hərbiləşmiş terrorçu təşkilatının başçısı kimi təqdim edib.
Xatırladaq ki, Erməni Milli Komitəsinin sabiq sədri Murad Topalyan 2000-ci ildə 4 il müddətinə azadlıqdan məhrum edilib. Onun 1980-ci ildə Türkiyənin BMT-dəki nümayəndəliyinin ofisi qarşısında həyata keçirilmiş terror aktının təşkilatçısı olduğu sübuta yetirilib. Karmin Anyello isə Nyu-York şəhərinin məşhur Qambino ailəsinə xidmət edib. O, avtomobil servisləri və metal tullantıları biznesinə nəzarət edərək milyonçu olub. “Öküz” 1984-cü ildə kriminal avtoritet Con Qottinin qızı Viktoriya ilə ailə qurub. Onların bu nikahdan 3 övladı var.