Amerika

Ana səhifə

Amerika

Ötən il 800 000 nəfər öz ölkəsini zorla tərk edib

18 iyun 2012 20:42 (UTC +04:00)

Bakı-APA. BMT-nin Qaçqınlar üzrə Ali Komissarlığının hesabatı 2011-ci ildə 800,000 nəfərin öz ölkəsini zorla tərk etməyə məcbur edildiyini göstərir. Bu barədə APA-ya BMT-nin Qaçqınlar üzrə Ali Komissarlığının Kommunikasiya və İctimaiyyətlə Əlaqələr Xidmətindən daxil olan məlumatda deyilir.

BMT-nin Qaçqınlar üzrə Ali Komissarlığının bu gün açıqlanan hesabatı 2011-ci ili öz ölkəsini zorla tərk etməyə məcbur edilmiş insanların sayına görə 2000-ci ildən indiyədək olan dövrdə rekord ili kimi göstərib.

BMT QAK-ın 2011-ci il Qlobal Meyllər hesabatı 2010-cu ilin sonlarında Fildişi Sahilində başlamış və sürətlə Liviya, Somali, Sudan və başqa yerlərdə davam etmiş əsas humanitar böhranlar zəncirinin törətdiyi zorla didərgin salınmaların həcminin detallarını ilk dəfə olaraq açıqlayıb. Bütövlükdə, 4,3 milyon insan didərgin salınıb, onlardan 800 000 nəfəri isə öz ölkəsini tərk edərək qaçqın olub.

Dünya üzrə, 42,5 milyon insan 2011-ci ili ya qaçqın (15,2 milyon), ya məcburi köçkün (26,4 milyon), ya da sığınacaq axtaran şəxs (895,000) kimi başa vurub. Yeni qaçqınların yüksək sayına baxmayaraq, ümumi rəqəm 2010-cu ildəki 43,7 milyon nəfərdən az olub. Bunun səbəbi əsasən öz yurdlarına qayıdan məcburi köçkünlərin balanslaşdırıcı təsiri olub: on ildən artıq bir müddət ərzində məcburi köçkünlərin qayıdışının ən yüksək həddi kimi 3,2 milyon göstərilir. Qaçqınlar arasında, könüllü qayıdışın 2010-cu ilə nisbətən artmasına baxmayaraq, 2011-ci il geri qayıtmalar üçün (532,000 qayıdış) onillik ərzində üçüncü ən aşağı göstəricisi olan il olub.

Onillik ərzində əsas məlumatları nəzərdən keçirməklə, hesabat bir neçə meylin olduğunu ortaya qoyur: Bunlardan biri zorla didərgin salınmanın dünya üzrə daha geniş sayda insana təsir etməsidir ki, son beş ildə ümumi rəqəm ilbəil artaraq 42 milyonu ötüb. Digəri isə odur ki, qaçqına çevrilmiş şəxslər əksər hallarda düşərgədə məskunlaşmaqla və ya şəhər yerində ağır şəraitdə yaşamaqla uzun illər qaçqın olaraq qalır. BMT QAK-ın mandatı altında olan 10,4 milyon qaçqından demək olar ki, dörddə üçü (7.1 milyon) mühacirətdə ən azı beş il ləngiyərək həll yolu gözləməkdədir.

Bütövlükdə Əfqanıstan (2,7 milyon) qaçqınların ən böyük istehsalçısı olaraq qalır, onun ardınca İraq (1,4 milyon), Somali (1,1 milyon), Sudan (500,000), və Konqo Demokratik Respublikası (491,000) gəlir.

Dünya qaçqınlarının beşdə dördü qonşu ölkələrə sığınıblar, məsələn, Pakistanda (1,7 milyon), İranda (886,500), Keniyada (566,500) və Çadda (366,500) olan geniş qaçqın kütləsi buna nümunədir.

İnkişaf etmiş ölkələr arasında Almaniya 571,700 nəfər qaçqınla ən çox sayda qaçqın qəbul edən ölkədir. Cənubi Afrika, öz növbəsində, fərdi sığınacaq müraciətlərinin (107,000) ən çox daxil olduğu ölkədir ki, bu status da son dörd ildə bu ölkəyə aid olub.