Amerika

Ana səhifə

Amerika

ABŞ-da 2001-ci il sentyabrın 11-də baş verən iri miqyaslı terror aksiyalarından 6 il ötür

11 sentyabr 2007 08:01 (UTC +04:00)

APA-nın məlumatına görə, altı il əvvəl Üsamə bin Ladenin rəhbərlik etdiyi “Əl-Kaida” terror təşkilatının üzvləri ABŞ-a məxsus dörd sərnişin təyyarəsini qaçıraraq dünya tarixində analoqu olmayan terror aktları törədiblər. Təyyarələrdən ikisi Nyu-Yorkdakı Dünya Ticarət Mərkəzinin əkiz qüllələrinə, biri Pentaqonun Vaşinqtondakı binasına çırpılıb. Digər təyyarə isə sərnişinlərin müqaviməti nəticəsində hədəfə yönəldilə bilməyib və Pensilvaniya ştatının insan yaşamayan hissəsində qəzaya uğrayıb. Terror nəticəsində 3 mindən çox adam həlak olub, 6 mindən çoxu yaralanıb. Prezident Corc Buş sentyabrın 12-də televiziya ilə xalqa müraciətində terror aktlarının təşkilatçılarının axtarışı və yaxalanması üçün kəşfiyyat və hüquq-mühafizə orqanlarına əmr verdiyini bildirib. Sentyabrın 15-də isə o, radio müraciətində ABŞ-ın terrorizmə qarşı geniş miqyaslı və uzunmüddətli hücuma hazırlaşdığını bəyan edib. C. Buş ölkə əhalisini səbrli və qətiyyətli olmağa çağıraraq mübarizənin asan olmayacağını və qısa müddətdə başa çatmayacağını vurğulayıb. ABŞ ilk olaraq Əfqanıstanda “Əl-Kaida” terror təşkilatı və “Taliban” hərəkatına qarşı antiterror əməliyyatına başlayıb (7 oktyabr 2001), daha sonra isə İraqa (20 mart 2003) hərbi müdaxilə edib. ABŞ Silahlı Qüvvələri hələ də bu ölkələrin ərazisində qalmaqdadır.
ABŞ-da mühəndis və memarlardan ibarət 130 nəfərlik ekspert qrupu isə hesab edir ki, Nyu-Yorkdakı əkiz qüllələri ABŞ hakimiyyəti özü partladıb. Onların fikrincə, Dünya Ticarət Mərkəzi terrorçu-kamikadzelərin aksiyası nəticəsində yox, əvvəlcədən binaya yerləşdirilmiş partlayıcı maddələrin partlaması nəticəsində çöküb. Amerika Memarlar İnstitutunun üzvü Riçard Qeydcem bildirib ki, 2001-ci il sentyabrın 11-də yaranan şok olayı rasional qiymətləndirməyə imkan verməyib: “Biz əkiz qüllələrin təyyarələrin çırpılması səbəbindən çökdüyü haqda yaradılan mifə inandıq. İndi bizə aydındır ki, əslində partlayıcı maddələrdən istifadə edilərək peşəkar demontaj həyata keçirilib. Hamıya məlumdur ki, belə bir əməliyyat mürəkkəb minalanma sistemi qurulmasını tələb edir. Ticarət Mərkəzindəki təhlükəsizlik və nəzarət sistemini nəzər aldıqda, belə bir işi terrorçuların həyata keçirdiyinə inanmaq olmur. Bütün bunları nəzərə alaraq biz dəhşətli bir nəticəyə gəlirik ki, terror aktının ssenarisi ABŞ-ın hakimiyyət dairələrində hazırlanıb”. /APA/