Amerika

Ana səhifə

Amerika

Hillari Klinton öz seçki fonduna şəxsi hesabından 5 milyon dollar köçürüb

07 fevral 2008 10:08 (UTC +04:00)

ABŞ-APA. ABŞ prezidentliyinə namizəd olmaq uğrunda mübarizə aparan Hillari Klinton öz seçki fonduna şəxsi hesabından 5 milyon dollar köçürüb. APA-nın beynəlxalq xəbər agentliklərinə istinadən verdiyi məlumata görə, H. Klinton seçki kampaniyasında uğur qazanacağına inandığı üçün bu qərara gəldiyini bildirib: “Yanvar ayında tərəfdarlarımdan mənim seçki fonduma rekord məbləğdə ianələr toplanıb. Amma rəqibim Barak Obama daha çox vəsait cəlb etməyə nail olub”. H. Klinton 3 gün ərzində 3 milyon dollar əlavə vəsait toplamaq üçün yeni sayt yaradacağını açıqlayıb. “The Time” jurnalı isə yazıb ki, H. Klintonun bəzi köməkçiləri və seçki kampaniyasının rəhbəri əməkhaqqı almaqdan imtina ediblər.
Xatırladaq ki, fevralın 5-də 20-dən çox ştatda keçirilən ilkin seçkilər demokratlar daxilində qalibi müəyyən etməyib. B. Obama 14, H. Klinton isə 8 ştatda qalib gəlib. Amma demokratların prezidentliyə rəsmi namizədinin elan olunacağı ümummilli qurultayda iştirak edəcək nümayəndələrin sayına görə H. Klinton irəlidədir. İndiyə qədər keçirilmiş “praymeriz”lərdə H. Klintonu dəstəkləyən 900, B. Obamanı dəstəkləyən 824 nümayəndə seçilib.