Bakı. Cavid Zeynallı - APA Bakıda ilk dəfə “Çörək festivalı” keçirilib. APA-məlumatına görə, festival Beynəlxalq Kulinariya Günü münasibətilə təşkil edilib. Tədbirdə mədəniyyət və turizm nazirinin müavini Sevda Məmmədəliyeva, Aşıqlar Birliyinin sədri Məhərrəm Qasımlı, millət vəkili Qənirə Paşayeva, bir sıra dövlət rəsmiləri, Azərbaycanda fəaliyyət göstərən diplomatik korpus nümayəndələri iştirak edib.
S. Məmmədəliyeva festivalın əhəmiyyətindən danışıb, bildirib ki, paytaxtla yanaşı bölgələrdə də kulinariya yarmarkaları təşkil olunmalıdır. Nazir müavini “Çörək festivalı”nıda nümayiş olunan məhsulların Azərbaycan mətbəxinin zənginliyinin bariz nümunəsi olduğunu diqqətə çatdırıb.
Azərbaycan Milli Kulinariya Mərkəzinin prezidenti Tahir Əmiraslanov rəhbərlik etdiyi qurumun il ərzində gördüyü işlər haqqında məruzə ilə çıxış edib.
Millət vəkilləri Qənirə Paşayeva və Ülviyyə Ağayeva Azərbaycan mətbəxinin zənginliyindən danışıb, festivala işində uğurlar arzu ediblər.
Tədbirdə milli mətbəxin təbliğində xüsusi roluna görə Natəvan Makili-Əliyevaya “Azərbaycan Milli Mətbəxinin Səfiri” diplomu təqdim olunub.
Qeyd edək ki, 2004-cü ildən başlayaraq hər il oktyabrın 20-si dünyada Beynəlxalq Kulinariya Günü kimi qeyd edilir. Həmin ildə Dünya Kulinariya Təşkilatları Birliyi tərəfindən İrlandiyanın paytaxtı Dublində keçirilən Dünya Kulinariya Konqresində elan edilib. Hazırda 115 ölkə bu günü qeyd edir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
