Aqrar-sənaye kompleksi

Ana səhifə

Azərbaycan «Saatlı-Pambıq» ASC-nin 30% səhmini satışa çıxarıb

22 dekabr 2008 07:40 (UTC +04:00)

Bakı. Rəşad Süleymanov – APA-Economics. Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) «Saatlı-Pambıq» ASC-nin səhmlərinin 30,11%-nin satışı üzrə investisiya müsabiqəsi elan edib. Bu barədə «APA-Economics»ə DƏİEDK-dən məlumat verilib.
Müsabiqədə yerli hüquqi və fiziki şəxslərlə yanaşı, xarici investorlar da iştirak edə bilərlər. Müsabiqəyə yekun vurularkən müəyyən edilmiş şərtlər daxilində maksimum həcmdə investisiya təklif etmiş və onun səmərəli qoyuluşu üzrə öhdəlik götürmüş iddiaçıya üstünlük veriləcək.
Saatlı rayonunun Sarıcalar kəndində yerləşən səhmdar cəmiyyətinin nizamnamə kapitalı 3 466 327,2 manat, buraxılmış səhmləri 1 733 164 ədəd, bir səhmin nominal dəyəri 2 manatdır. Hərraca 1 040 954 manat nominal dəyərində 520 477 səhm çıxarılıb. Səhmdar cəmiyyətinin cəmi öhdəlikləri 4 301 932,04 manat, o cümlədən, əməkhaqqı və ona bərabər borclar 36 797 manat, mal, iş və xidmətlərə görə borclar 4 265 135,04 manat, səhmdar cəmiyyətinin debitor borcları isə 2 741 987,28 manatdır.
İddiaçıların təqdim edəcəyi İnvestisiya Proqramında pambıq emalının təkmilləşdirilməsi və onun satışının genişləndirilməsi, səhmdar cəmiyyətinin səhmlərinin alqı-satqı müqaviləsi imzalandığı tarixdən 90 gün müddətində təklif olunmuş investisiya həcminin ümumi məbləğinin 5%-ə qədərinin pul vəsaiti şəklində səhmdar cəmiyyətinin hesablaşma hesabına köçürüləcək məbləğinə və ondan istifadəyə dair təklif, həmçinin dövlət büdcəsinə ödəniləcək 286 min manat vəsaitə dair təklifin verilməsinə təkliflər öz əksini tapmalıdır.
İddiaçıların ərizə və təkliflərinin qəbulu 2009-cu il yanvarın 30-dək aparılacaq. Müsabiqə Komissiyası tərəfindən müsabiqə təkliflərinin qiymətləndirilməsi fevralın 3-dən başlayaraq həyata keçiriləcək.