Aqrar-sənaye kompleksi

Azərbaycanda «Ağcabədi-Pambıq» ASC-nin səhmlərinin 30%-nin satışı üzrə investisiya müsabiqəsi keçirilir

23 dekabr 2008 13:21 (UTC +04:00)

Bakı. Rəşad Süleymanov – APA-Economics. Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) «Ağcabədi-Pambıq» ASC-nin səhmlərinin 29,96%-nin satışı üzrə investisiya müsabiqəsi elan edib. Bu barədə «APA-Economics»ə DƏİEDK-dən məlumat verilib.
Müsabiqədə yerli və xarici investorlar iştirak edə bilərlər. İddiaçıların təqdim edəcəkləri İnvestisiya Proqramında xam pambıq emalının təkmilləşdirilməsi və onun satışının genişləndirilməsi, müqavilə imzalandığı tarixdən 90 gün müddətində təklif olunmuş investisiya həcminin ümumi məbləğinin 5%-ə qədərinin pul vəsaiti şəklində səhmdar cəmiyyətinin hesablaşma hesabına köçürüləcək məbləğinə və ondan istifadəyə, dövlət büdcəsinə ödəniləcək 165 min manat vəsait və ondan istifadəyə dair təkliflər əksini tapmalıdır.
Qeyd edək ki, 1953-cü ildə istismara verilmiş səhmdar cəmiyyətinin nizamnamə kapitalı 1 984 317 manat, buraxılmış səhmləri 992 159 ədəd, bir səhminin nominal dəyəri 2 manatdır. Satışa ümumi nominal dəyəri 594 426 manat olan 297 213 səhmi çıxarılıb. Səhmdar cəmiyyətinin cəmi öhdəlikləri 2 684 027,28 manat, o cümlədən əməkhaqqı və ona bərabər borclar 37 274,33 manat, mal, iş və xidmətlərə görə borclar 2 646 752,95 manat, debitor borcları isə 174 823,20 manatdır.
İddiaçıların ərizə və təkliflərinin qəbulu 2009-cu ilin yanvarın 21-dək davam edəcək, Müsabiqə Komissiyası tərəfindən təkliflərin qiymətləndirilməsinə isə yanvarın 23-də başlanacaq.