Aqrar-sənaye kompleksi

Azərbaycan «Biləsuvar-Pambıq» ASC-nin səhmlərini satışa çıxarıb

23 dekabr 2008 13:58 (UTC +04:00)

Bakı. Rəşad Süleymanov – APA-Economics. Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) «Biləsuvar-Pambıq» ASC-nin səhmlərinin 30,09%-nin satışı üzrə investisiya müsabiqəsi elan edib. Bu barədə «APA-Economics»ə DƏİEDK-dən məlumat verilib.
Müsabiqədə yerli və xarici investorlar iştirak edə bilərlər. Müsabiqəyə yekun vurularkən müəyyən edilmiş şərtlər daxilində maksimum həcmdə investisiya təklif etmiş və onun səmərəli qoyuluşu üzrə öhdəlik götürmüş iddiaçıya üstünlük veriləcək.
Səhmdar cəmiyyətinin nizamnamə kapitalı 2 477 524 manat, buraxılmış səhmləri 1 238 762 ədəd, bir səhmin nominal dəyəri isə 2 manatdır. Satışa ümumi nominal dəyəri 745 514 manat olan 372 757 səhm çıxarılıb.
Səhmdar cəmiyyətinin cəmi öhdəlikləri 6 127 019 manat, o cümlədən əməkhaqqı və ona bərabər borclar 28 963 manat, mal, iş və xidmətlərə görə borclar 6 098 056 manat, debitor borclar isə 1 096 982 manatdır.
İddiaçılar təqdim edəcəkləri İnvestisiya Proqramında pambıq emalının təkmilləşdirilməsi və onun satışının genişləndirilməsi, səhmlərin alqı-satqı müqaviləsi imzalandığı tarixdən 90 gün müddətində təklif olunmuş investisiya həcminin 5%-ə qədərinin pul vəsaiti şəklində səhmdar cəmiyyətinin hesablaşma hesabına köçürüləcək məbləğinə və ondan istifadə, dövlət büdcəsinə ödəniləcək 200 min manat məbləğində pul vəsaitinə dair təkliflər əksini tapmalıdır.
İddiaçıların ərizə və təkliflərinin qəbulu 2009-cu ilin yanvarın 27-dək aparılacaq, müsabiqə təkliflərinin qiymətləndirilməsinə isə yanvarın 29-da başlanılacaq.