Aqrar-sənaye kompleksi

Azərbaycan kənd təsərrüfatı istehsalçılarına dövlət yardımlarının göstərilməsi üzrə yeni mexanizmlər hazırlayır

15 yanvar 2009 10:38 (UTC +04:00)

Bakı. Rəşad Süleymanov – APA-Economics. Azərbaycanda kənd təsərrüfatı məhsulları istehsalçılarına dövlət yardımlarının göstərilməsinin yeni mexanizmləri hazırlanır. Bu barədə «APA-Economics»ə Kənd Təsərrüfatı Nazirliyindən (KTN) məlumat verilib.
Hazırda KTN İqtisadi İnkişaf Nazirliyi ilə birlikdə yeni mexanizmlər üzərində işləyir. Detalları açıqlanmasa da bu il ərzində yeni yardım mexanizmlərinin hazırlanaraq təsdiq olunması, həmçinin bu gün qüvvədə olan sənədlərin təkmilləşdirilməsi nəzərdə tutulur.
Nazirlikdən bildirilib ki, təkmilləşdirmələr fermerlərə subsidiyaların verilməsi, onların texnika, gübrə və kimyəvi vasitələrlə təminatının yaxşılaşdırılması, bazara çıxış imkanlarının genişləndirilməsi, özəl texniki və digər xidmətlərin göstərilməsi sisteminin genişləndirilməsi və s. bağlıdır.
Bununla yanaşı, aqrar maliyyə xidmətlərinin tranzaksiya xərclərinin azaldılması məqsədilə normativ hüquqi bazanın, sığortalanmasına maliyyə yardımı göstərilən kənd təsərrüfatı əmlakının və sığorta hadisələrinin növlərinin siyahısının, taxıl istehsalındakı risklərin qismən dövlət tərəfindən sığortalanması qaydalarının, taxıl istehsalçılarına maliyyə stimulları mexanizminin təkmilləşdirilməsi nəzərdə tutulur.
Qeyd edək ki, hazırda ərzaq buğdası əkmiş fermerlərə hər hektara görə 40 manat, həmçinin yanacağa görə əlavə 40 manat yardım verilir. «Aqrolizinq» ASC tərəfindən mineral gübrələr 50%-i dövlət tərəfindən kompensasiya olunmaqla fermerlərə satılır. Cari ilin yanvar ayının 1-dən daha 5 il müddətinə kənd təsərrüfatı məhsulları istehsalçıları torpaq vergisi istisna olmaqla, bütün vergilərdən azad edilib.
Ötən ilin avqust ayında Azərbaycan prezidenti «2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı»nı təsdiq edib.