Aqrar-sənaye kompleksi

Ana səhifə

Azərbaycanın kənd təsərrüfatı sektorunun inkişaf etdirilməsinə dair FAO ilə birgə sənəd hazırlanacaq

28 yanvar 2009 13:57 (UTC +04:00)

Bakı. Rəşad Süleymanov – APA-Economics. Bu gün Bakıda Azərbaycan hökuməti ilə BMT-nin Ərzaq və Kənd Təsərrüfatı Təşkilatı (FAO) arasında Milli Ortamüddətli Prioritet Çərçivə Sənədinin hazırlanmasına dair seminar keçirilib.
«APA-Economics»in məlumatına görə, Azərbaycan kənd təsərrüfatı nazirinin müavini Bəhram Əliyev bildirib ki, hazırlanacaq sənəd Azərbaycanla FAO arasında əməkdaşlığı daha da genişləndirəcək. Azərbaycanda aqrar sektorun vəziyyəti barədə danışan nazir müavininin sözlərinə görə, hazırda ölkə ərazisinin 4 mln. kv. metri erroziyaya, daha 1 mln. kv. metri isə şoranlaşmaya məruz qalıb: «Bu sənəd kənd təsərrüfatı sektorunda prioritet sahələrin müəyyənləşdirilməsini və yardımların göstərilməsini özündə əks etdirəcək. Konkret olaraq üç sahədə – əkinçilik, heyvandarlıq və torpaqların mühafizəsi sistemində problemlər var. Bu sənəd çərçivəsində həmin sahələrə yardımların göstərilməsi nəzərdə tutulur».
B.Əliyev qeyd edib ki, hazırda prioritet sahələrə həmçinin taxılçılığın və damazlıq təsərrüfatlarının inkişaf etdirilməsi də aiddir. Bu istiqamətdə Kənd Təsərrüfatı Nazirliyi beynəlxalq təşkilatlarla birgə iş aparır.
FAO-nun Azərbaycan ofisinin rəhbəri Mustafa Sinakeur (Mustafa Sinaceur) isə bildirib ki, Azərbaycan üçün Milli Ortamüddətli Prioritet Çərçivə Sənədi ölkədəki vəziyyətin qısa təsviri, təhlili və beynəlxalq qurumlarla aparılacaq məsləhətləşmələrə əsaslanaraq növbəti 3-4 il müddətində FAO-nun ölkəyə mümkün yardımı üçün prioritet fəaliyyətlərin müəyyən edilməsindən ibarət olacaq: «Sənədin əsas məqsədi ölkədəki fəaliyyətlərin səmərəliliyinin və əlaqələndirilməsinin gücləndirilməsi, FAO yardımının strateji prioritetləşdirilməsi, tərəfdaşlıq əlaqələrinin gücləndirilməsi və gələcək inkişafı, təkrarçılığın qarşısının alınması və ehtiyatların artırılması, ərzaq təhlükəsizliyi və kənd təsərrüfatının inkişaf etdirilməsi məqsədilə ehtiyatların səfərbər edilməsinin dəstəklənməsi və FAO-nun sahə proqramının həyata keçirilməsində ehtiyatların səfərbər edilməsinin gücləndirilməsindən ibarətdir».
Kənd Təsərrüfatı Nazirliyi bitkiçilik və toxumçuluq şöbəsinin müdiri Sabir Vəliyev isə bildirib ki, FAO indiyədək müxtəlif vaxtlarda Azərbaycanda həyata keçirilən layihələrə dəstək verib. Bu sənəd çərçivəsində Azərbaycana FAO tərəfindən texniki yardımların göstərilməsi, həmçinin maliyyə dəstəyi nəzərdə tutulur.