Aqrar-sənaye kompleksi

Ana səhifə

Azərbaycanda genetik modifikasiya olunmuş orqanizmlər tərkibli malların idxalına qadağanın qoyulması təklif edilir

30 yanvar 2009 11:17 (UTC +04:00)

Bakı. Elnur Hüseynquluyev – APA-Economics. Bu gün Azad İstehlakçılar Birliyi (AİB) «Biomüxtəlifliyin qorunmasında istehlakçı təşəbbüsü» layihəsi çərçivəsində keçirdiyi tədqiqatların nəticələrini açıqlayıb.
«APA-Economics»in məlumatına görə, tədbirdə çıxış edən layihənin koordinatoru Eyyub Hüseynov bildirib ki, tədqiqat Azərbaycanın 4 broyler fabrikində quş yemlərinin tərkib göstəricisi sertifikatları əsasında təhlil edilib. Nəticədə məlum olub ki, broyler fabriklərinə Rusiya, Braziliya, Latviya və Argentinadan quş yemləri gətirilir və əksər hallarda bu yemlərin tərkibində «soya jmıxı» olur. Bu broylerlərdə genetik modifikasiya olunmuş orqanizmlər (GMO) yemlərin tərkibinə qarışdırılaraq quşların yemlənməsində istifadə olunur. Lakin broyler sahibləri GMO haqqında məlumatsızdır.
E.Hüseynovun sözlərinə görə, tədqiqatlar heyvandarlıq fermalarında da aparılıb və nəticədə məlum olub ki, bu fermalarda yemlərə GMO komponenti qarışdırılmır. Bu fermalarda heyvanlara verilən yemlər yerli məhsullardan ibarətdir.
E.Hüseynov bildirib ki, AİB ekspertləri Azərbaycanın qoşulduğu Biomüxtəliflik haqqında Konvensiyanı, bu konvensiyadan irəli gələn və Azərbaycanın 2005-ci ildə qoşulduğu Kartagen Protokolunu təhlil ediblər. Qurum beynəlxalq sənədlərin tələblərindən irəli gələn öhdəlikləri araşdıraraq, hökumətə öz təkliflərini təqdim edib. Bu təkliflər sırasına GMO mallarının Azərbaycana idxalına qadağa qoyulması, GMO əkinçiliyinə son qoyulması, ekoloji əkinçiliyin subsidiyalaşdırılaraq təşviq edilməsi, GMO-nu müəyyən edən laboratoriyaların yaradılması, kadrların hazırlanması və tərkibində GMO olan malların markalanması daxildir.
E.Hüseynovun sözlərinə görə, bütün bunlarla bağlı AİB Dövlət Gömrük Komitəsi və Kənd Təsərrüfatı Nazirliyindən rəsmi cavablar alıb. Cavablarda bildirilir ki, Azərbaycanda GMO mallarının satışına qadağa qoyulmayıb, həmçinin bunları müəyyən edən laboratoriyalar yoxdur.
Qeyd edək ki, layihə Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən ayrılan 6 min manat qrant hesabına maliyyələşdirilib.