Aqrar-sənaye kompleksi

Yaponiya aztəminatlı fermerlərə yardım məqsədilə Azərbaycana daha 3,4 mln. dollar ayıracaq

30 yanvar 2009 14:39 (UTC +04:00)

Bakı. Rəşad Süleymanov – APA-Economics. Bu gün Bakıda Yaponiya hökumətinin 2 KR proqramı çərçivəsində «Aztəminatlı fermerlərə qrant yardımı Layihəsi» üzrə Notalar Mübadiləsi sənədi imzalanıb. «APA-Economics»in məlumatına görə, layihə çərçivəsində Yaponiya hökuməti Azərbaycana 3,398 mln. ABŞ dolları (300 mln. yen) məbləğində qrant ayıracaq.
Azərbaycanın kənd təsərrüfatı naziri İsmət Abasov bildirib ki, Notalar Mübadiləsinə əsasən, 1998-2003-cü illərdə Yaponiya qrantları hesabına xaricdən 773 texnika, o cümlədən 212 traktor, 207 taxılyığan kombayn və digər texnika alınaraq lizinq yolu ilə fermerlərə verilib.
«Yaponiya qrantları hesabına alınmış və icarəyə verilmiş texnikanın istifadəsindən Tərəfdaşlıq Fonduna yığılmış vəsait hesabına 2004-cü ildə 62 taxılyığan kombayn, 64 traktor və digər texnika alınıb. Yaponiya hökumətinin 2 KR layihəsi çərçivəsində 2005-ci ildə ayrılmış 200 mln. yenə 25 ədəd «SAMPO» markalı kombayn alınıb», - deyə nazir bildirib.
Nazir əlavə edib ki, qrant hesabına Yaponiya tərəfi kənd təsərrüfatı texnikasını ölkəyə gətirərək taxıl biçini mövsümünə qədər «Aqrolizinq» ASC-yə verəcək.
Yaponiyanın Azərbaycandakı səfiri Masamitsu Oki isə bildirib ki, ölkəsi indiki layihə də daxil olmaqla, 2KR proqramı çərçivəsində Azərbaycanda ümumi dəyəri 26,78 mln. dollar olan 8 qrant layihəsi həyata keçirib. Layihələr gələcəkdə də davam edəcək.
Qeyd edək ki, Yaponiya Azərbaycana Rəsmi İnkişaf Yardımı çərçivəsində infrastrukturun yaxşılaşdırılması, kənd təsərrüfatı, sosial sahə, mədəniyyət və insan resurslarının inkişafına 730 mln. dollar ayırıb.