Aqrar-sənaye kompleksi

Ana səhifə

Gələn ay Almaniyadan Azərbaycana daha 400 baş inək gətiriləcək

05 fevral 2009 10:12 (UTC +04:00)

Bakı. Rəşad Süleymanov – APA-Economics. «Aqrolizinq» ASC-nin Almaniyadan aldığı cins inəklərin növbəti partiyası Azərbaycana bu ilin mart ayında gətiriləcək. Bu barədə «APA-Economics»ə «Aqrolizinq» ASC-nin tingçilik, toxumçuluq və damazlıq heyvandarlıq şöbəsinin müdiri Kamil Şamilov məlumat verib.
K.Şamilovun sözlərinə görə, yanvar ayının sonunda Almaniyada səfərdə olan «Aqrolizinq»in nümayəndələri növbəti partiyada ölkəyə gətiriləcək inəkləri seçiblər.
İkinci partiyada Azərbaycana 400 baş cins inək gətiriləcək. İkinci partiyada şvis, südlük qara-ala, Holstin-Friz və Sim-mental cinsli inəklər olacaq.
K.Şamilov 198 cins heyvandan ibarət ilk partiyanın Azərbaycana gətirildiyini və hazırda karantin dövrü keçdiyini bildirib.
Heyvanları «Aqrolizinq» ASC-nin elan etdiyi tenderdə qalib gəlmiş Böyük Britaniyanın «Rista Alliance» şirkəti gətirir. Tenderin şərtlərinə əsasən, 300 baş Şvis cinsli, 500 baş südlük qara-ala və Holstin-Friz cinsli, 200 baş südlük Sim-mental cinsli qaramalın satın alınması nəzərdə tutulur.
Heyvanların qiymətinin 50%-i dövlət tərəfindən güzəşt olunur. Fermerlər qalan 50% vəsaitin yarısını əvvəlcədən, qalan hissəsini isə 3 il ərzində hissə-hissə ödəməlidir.
Almaniyadan bir inəyin Azərbaycana gətirilməsi 3600-3800 manata başa gəlir.