Aqrar-sənaye kompleksi

Ana səhifə

Azərbaycanda Şimal-Qərb Kənd İnkişafı Layihəsinin icrasına başlanıb

27 fevral 2009 13:58 (UTC +04:00)

Bakı. Rəşad Süleymanov – APA-Economics. Bu gün Bakıda Şimal-Qərb Kənd İnkişafı Layihəsinin başlanmasına həsr olunmuş seminar keçirilib. «APA-Economics»in məlumatına görə, tədbirdə çıxış edən Azərbaycanın kənd təsərrüfatı naziri İsmət Abasov ölkə hökumətinin İFAD təşkilatı ilə sıx əməkdaşlıq etdiyini və təşkilatın dəstəyi ilə həyata keçirilən layihələrin müsbət nəticələr verdiyini vurğulayıb.
Nazirlər Kabinetinin investisiyalar şöbəsinin müdiri Nail Fətəliyev isə bildirib ki, hökumət 2004-cü ildən hər il dövlət zəmanəti ilə alınmış kreditlərin və qrantların 5-ə qədərini kənd təsərrüfatı sektoruna yönəldir. Nəticədə, kənd təsərrüfatı sektorunda həyata keçirilən layihələrin müsbət nəticələri görünür.
İFAD-ın ölkə üzrə proqram direktoru Abdelkərim Sma isə artıq start verilmiş layihənin ümumi dəyərinin 32 mln. ABŞ dolları olduğunu və bunun 17,2 mln. dollarının İFAD tərəfindən ayrıldığını vurğulayıb.
İFAD-ın 12 ildir Azərbaycan hökuməti ilə əməkdaşlıq etdiyini deyən M.Sma bu günədək təşkilatın dəstəyi ilə Şimal-Qərb Kənd İnkişafı Layihəsi də daxil olmaqla ümumi dəyəri 112 mln. dollar olan 4 layihənin həyata keçirildiyini bildirib.
M.Smanın sözlərinə görə, layihə üç komponentdən - suvarma sistemlərinin bərpası, kənd təsərrüfatında məhsuldarlığın artırılması və maliyyə xidmətlərindən ibarətdir.
Kənd Təsərrüfatı Kreditləri üzrə Dövlət Agentliyinin direktor müavini Vüqar Əliyev isə bildirib ki, layihə Şəmkir, Tovuz, Qazax və Ağstafa rayonlarını əhatə edəcək və müddəti 5 ildir. Layihənin 17,2 mln. dolları İFAD, 13 mln. dolları Azərbaycan hökuməti, 1,6 mln. dolları isə benefisarilərin payına düşür. Layihədən 37 min təsərrüfat bəhrələnəcək.
Qeyd edək ki, Şimal-Qərb Kənd İnkişafı Layihəsinin maliyyələşdirilməsinə dair Azərbaycan hökuməti ilə İFAD arasında saziş 2008-ci ilin iyun ayında imzalanıb və avqust ayında təsdiqlənib.