Aqrar-sənaye kompleksi

Ana səhifə

Naxçıvanda kənd təsərrüfatının inkişafına dair müşavirə keçirilib

04 mart 2009 07:18 (UTC +04:00)

Naxçıvan. C. Qurbanoğlu-APA Naxçıvan Muxtar Respublikası (MR) Ali Məclisində 2008-ci ildə kənd təsərrüfatı sahəsində görülən işlərin yekunu və cari ildə qarşıda duran vəzifələrə dair müşavirə keçirilib. APA-nın yerli bürosunun məlumatına görə, müşavirədə çıxış edən Naxçıvan MR Ali Məclisinin sədri Vasif Talıbov kənd təsərrüfatı sahəsində qazanılan uğurlardan danışıb, əldə olunan nailiyyətləri rəqəm və faktlarla təhlil edib.

Bölgədə 100 minə yaxın torpaq mülkiyyətçisinin mövcud olduğunu deyən Ali Məclis sədri «2008-2015-ci illərdə Naxçıvan MR-də əhalinin ərzaq məhsulları ilə etibarlı təminatına dair Dövlət Proqramı»na əsasən taxıl və kartof əkini sahələrinin genişləndirilməsinin, əhalinin bostan-tərəvəz məhsullarına olan tələbatının davamlı təmin olunması üçün soyuducu anbarlar qurulmasının vacibliyini bildirib. O, əkinçiliklə bağlı texnika sarıdan hər hansı problemin olmayacağını diqqətə çatdırıb, bununla bağlı yeni texnikaların gətirilməsi üçün müvafiq müqavilələrin imzalandığını deyib.

Muxtar respublikanın 5,3 min kvadrat kilometr ərazisindən, cəmi 10,6 faizinin əkinəyararlı torpaqlar olduğunu xatırladan V. Talıbov belə torpaqların qorunması, əkin torpaqlarında obyektlərin, yaşayış sahələrinin tikilməsinə yol verilməməsi, mövcud potensialdan səmərəli istifadə etməklə muxtar respublika əhalisi kənd təsərrüfatı məhsulları ilə tam təmin olunmasının zəruriliyini qeyd edib.
Müşavirədə ayrı-ayrı təşkilatların rəhbərlərinin çıxışları dinlənilib, yaz-tarla işlərinə hazırlığın vəziyyəti və yaşıllaşdırma tədbirləri ilə əlaqədar məsələlər müzakirə edilib.