Aqrar-sənaye kompleksi

Ana səhifə

Azərbaycan kartof əkin sahələrini 60% artırıb

19 mart 2009 07:20 (UTC +04:00)

Bakı. Nicat Mustafayev – APA-Economics. Bu ilin mart ayının 1-i vəziyyətinə Azərbaycanda 33,2 min hektar və ya keçən ildəkindən 11% çox sahədə yazlıq bitkilər əkilib.
Dövlət Statistika Komitəsindən «APA-Economics»ə verilən məlumata görə, yazlıqların tərkibində birillik və çoxillik otların əkin sahəsi istisna olmaqla, əsasən bütün yazlıqların əkinində keçən ilin müvafiq dövrünə nisbətən xeyli artım olub. Belə ki, mövsümün əvvəlindən keçən ildəkindən 10,4% çox sahədə dənli və dənli paxlalılar (qarğıdalısız), 60% çox kartof, 10,7% çox tərəvəz bitkiləri, 6,3% çox sahədə isə dən üçün günəbaxan əkilib.
Bundan başqa, cari ilin yanvar-fevral aylarında ölkə üzrə diri çəkidə ət istehsalı keçən ilin müvafiq dövründəkinə nisbətən 1,2%, süd istehsalı 2,8%, yumurta istehsalı isə 20% artıb.
Bu ilin yanvar-fevral aylarında Azərbaycanda tərəvəz və əsas heyvandarlıq məhsullarının istehsalının keçən ilin müvafiq dövrünə nisbətən artması bütövlükdə kənd təsərrüfatının ümumi məhsulunun artımına təsir göstərib. Nəticədə, bitkiçilik məhsullarının istehsalı sabit qiymətlərlə 4,9%, heyvandarlıq məhsullarının istehsalı 3,6%, ümumi məhsul isə 3,6% artıb.
Hesabat dövründə balıqçılıqla məşğul olan təsərrüfatlar tərəfindən 19 min manat dəyərində balıq ovlanıb.