Aqrar-sənaye kompleksi

Ana səhifə

Azərbaycanın iqtisadi inkişaf naziri Bakıda səfərdə olan Almaniya sahibkarları görüşüb

07 aprel 2009 09:24 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyində Bakıda səfərdə olan Almaniyanın kənd təsərrüfatı sahəsinin aparıcı şirkətlərinin nümayəndələri ilə görüş keçirilib.
Nazirlikdən «APA-Economics»ə verilən məlumata görə, iqtisadi inkişaf naziri Şahin Mustafayev Azərbaycanda aparılan iqtisadi islahatlar, qazanılmış uğurlar barədə qonaqlara ətraflı məlumat verib və qeyd edib ki, hazırda qeyri-neft sektorunun inkişafı iqtisadi siyasətin prioritetlərindəndir, bu sahənin əsas istiqamətlərindən olan kənd təsərrüfatının inkişafına isə xüsusi diqqət yetirilir. Buna misal olaraq, nazir dövlət başçısının 2008-ci ilin avqustun 25-də təsdiqlədiyi Azərbaycanda əhalinin ərzaq məhsulları ilə etibarlı təminatına dair Dövlət Proqramını (2008-2015-ci illər) xatırladıb.
Ş.Mustafayev Almaniya şirkətlərinin Azərbaycanın aqrar sektoruna marağını yüksək qiymətləndirib, Azərbaycan hökumətinin «RAO Global Group»un Ağstafa rayonunda həyata keçirməyi planlaşdırdığı layihəni dəstəklədiyini, bu cür layihələrin Azərbaycanın digər bölgələrində də reallaşdırılmasının məqsədəuyğun olduğunu vurğulayıb.
«RAO Global Group»un layihə rəhbəri Rəsul Orucov «Ağstafasüd» kompleksinin layihəsi ilə bağlı məlumat verib və artıq layihənin icrası ilə bağlı Ağstafada müvafiq araşdırmaların aparıldığını bildirib. Layihənin eksperti, «İAK Agrar Consulting» şirkətinin nümayəndəsi Nordfrid Bruno Sçeuneman layihənin həyata keçirilməsində Almaniyada, eləcə də dünyada kənd təsərrüfatı sahəsində tanınmış alman şirkətlərinin iştirak edəcəyini qeyd edib və artıq müvafiq ekspertiza işlərinə başlandığını vurğulayıb.
Layihəyə əsasən, Almaniyanın «Claas Global Sales», «Lemken», «Grimme» şirkətlərinin təmsil olunduğu «RAO Global Group» Azərbaycanın qərb bölgəsində «Ağstafasüd» kompleksinin layihələndirilməsi və inşasını həyata keçirəcək. Belə ki, rayonda südçülük təsərrüfatının və müvafiq yem təsərrüfatının, müasir Avropa texnikası ilə təchiz edilmiş «Aqroservis»in, gündəlik 80 ton istehsal gücü olan Süd Emalı Zavodunun tikintisi nəzərdə tutulur. Ümumi dəyəri təqribən 28 mln. avro təşkil edən layihənin icrası nəticəsində 230 nəfərin daimi işlə, 80 nəfərin isə mövsümü işlə təmin ediləcəyi gözlənilir.