Aqrar-sənaye kompleksi

Ana səhifə

Azərbaycan hökuməti ilə Dünya Bankı arasında yeni kredit sazişi imzalanıb

20 aprel 2009 15:39 (UTC +04:00)

Bakı. Rəşad Süleymanov – APA-Economics. Bu gün Bakıda Azərbaycan Kənd Təsərrüfatı Nazirliyi (KTN) ilə Dünya Bankı (DB) arasında Azərbaycan Kənd İnvestisiyaları Layihəsinin (AzKİL) davam etdirilməsinə dair kredit sazişi imzalanıb. «APA-Economics»in məlumatına görə, sazişi kənd təsərrüfatı naziri İsmət Abasov və DB-nın Azərbaycan nümayəndəliyinin rəhbəri Qreqori Yedjeyçak imzalayıb.
İ.Abasov son illər Azərbaycanda aqrar sektorun inkişaf tendensiyalarından danışıb. Nazir bildirib ki, ötən il Azərbaycanın kənd təsərrüfatı sektorunda məhsul istehsalı 6,1%, cari ilin birinci rübündə isə 2008-ci ilin müvafiq dövrünə nisbətən 4,3% artıb.
Layihənin mahiyyətindən danışan nazir qeyd edib ki, 2004-cü ildə təsdiq olunmuş AzKİL üç komponentdən ibarətdir: infrastruktur, potensialın gücləndirilməsi və layihənin idarə olunması. Layihə hazırda 21 rayonda kənd icmalarını əhatə edir. Yeni maliyyələşdirmə isə əlavə 24 rayonu və təxminən 250 icmanı əhatə edəcək. Layihənin birinci mərhələsinin ümumi dəyəri 21,1 mln. ABŞ dolları təşkil edib. Bunun 15 mln. dollarını DB-nın kreditləri, 3,3 mln. dollarını Yaponiya hökumətinin qrantı, 1,35 mln. dollarını Azərbaycan hökumətinin payı, 1,45 mln. dollarını isə icma iştirak payları təşkil edib. Əlavə maliyyələşdirmənin dəyəri isə 15 mln. dollar təşkil edir. Kredit Azərbaycan hökumətinə ilk 10 ili güzəştli dövr olmaq şərti ilə 35 ilə, illik 0,75% dərəcəsi ilə ayrılır.
Q.Yedjeyçak isə qeyd edib ki, Dünya Bankı ilə Azərbaycan arasında imzalanan bu saziş regionların sosial-iqtisadi inkişaf proqramının ikinci mərhələsinin icrasına təkan verəcək.