Aqrar-sənaye kompleksi

Ana səhifə

Azərbaycan bu gündən idxal buğda və una ƏDV-nin tətbiqini bərpa edib

01 may 2009 06:43 (UTC +04:00)

Bakı. Rəşad Süleymanov – APA-Economics. Azərbaycanda 2009-cu il may ayının 1-dən idxal olunan ərzaq buğdası, düyü, buğda və çovdar ununa əlavə dəyər vergisinin (ƏDV) tətbiqi bərpa olunub. Bu barədə «APA-Economics»ə Kənd Təsərrüfatı Nazirliyindən məlumat verilib.
Kənd Təsərrüfatı Nazirliyindən bildirilib ki, idxal buğdaya və una ƏDV-nin tətbiqi ölkədə taxıl istehsalçılarının marağını artıracaq.
Azərbaycana idxal olunan ərzaq buğdası, düyü və unun ƏDV-dən azad edilməsi ilə bağlı Nazirlər Kabinetinin qərarı 2008-ci ilin mayın 1-də qüvvəyə minib və 1 il qüvvədə olub.
Qeyd edək ki, ötən il Azərbaycanda 904,7 min hektar sahədən ilkin çəkidə rekord səviyyədə - 2 498,3 min ton taxıl (qarğıdalı daxil olmaqla) məhsulu toplanılıb. Hektarın orta məhsuldarlığı 2007-ci ilə nisbətən 0,5 sentner artaraq 27,6 sentnerə yüksəlib.
Dövlət Statistika Komitəsindən verilən məlumata görə, 2008-ci ildə istehsal olunmuş taxılın 67,1%-ni və ya 1 677,5 min tonunu buğda təşkil edib. Ümumiyyətlə, 2008-ci ildə dənli və dənli paxlalıların əkin sahəsinin 2007-ci ilə nisbətən 22,3% və ya 165,2 min hektar artması ümumi istehsala müsbət təsir edib.
Cari ilin yanvar-mart aylarında isə Azərbaycana xarici ölkələrdən 372 167,6 ton ərzaq buğdası və 17 682 ton un idxal edilib. Buğda idxalı 2008-ci ilin I rübünə nisbətən 46,1%, un idxalı isə 7,8 dəfə artıb.
Xatırladaq ki, Azərbaycanda ƏDV-nin dərəcəsi 18% təşkil edir.