Aqrar-sənaye kompleksi

Ana səhifə

Kənd təsərrüfatı naziri İsmət Abasov: «Azərbaycan gələn ildən taxıl ixrac edəcək»

15 may 2009 11:04 (UTC +04:00)

Gəncə. Cəmşid Bəxtiyar – APA. Azərbaycanda taxıl və taxıl məhsullarının bahalaşacağı, ərzaq taxılı qıtlığı ilə bağlı yayılan şayiələr əsassızdır. APA-nın Qərb bürosunun məlumatına görə, bunu kənd təsərrüfatı naziri İsmət Abasov Azərbaycan Dövlət Aqrar Universitetində (Gəncə) keçirilən beynəlxalq konfrans çərçivəsində jurnalistlərə verdiyi açıqlamada bildirib.

Nazir ölkədə ötən ildən qalan və sonrakı dövrdə idxal edilən taxıl ehtiyatlarının daxili tələbatı artıqlaması ilə ödədiyini vurğulayıb. «Cəmi bir ay sonra yerli istehsalçıların bu ilin məhsulunu götürəcəyini nəzərə alsaq, bu şayiələrin əsassızlığı daha aydın görünər. Təkcə ötən ilin payızında 800 min hektar ərazidə ərzaq buğdası əkilib və bu sahələrdən 2,160 mln. ton məhsul yığımı gözlənilir», - deyə İ.Abasov vurğulayıb.

Nazir yerli istehsalın artım tempinin nikbin vədlər verdiyini də vurğulayıb: «Artıq gələn ildən Azərbaycan taxıl ixrac edən ölkələrin sırasına qoşula biləcək».

Qeyd edək ki, 2008-ci ildə Azərbaycanda 904,7 min hektar sahədən ilkin çəkidə rekord səviyyədə - 2 498,3 min ton taxıl (qarğıdalı daxil olmaqla) məhsulu toplanılıb. Hektarın orta məhsuldarlığı 2007-ci ilə nisbətən 0,5 sentner artaraq 27,6 sentnerə yüksəlib.

Dövlət Statistika Komitəsindən verilən məlumata görə, 2008-ci ildə istehsal olunmuş taxılın 67,1%-ni və ya 1 677,5 min tonunu buğda təşkil edib. Ümumiyyətlə, 2008-ci ildə dənli və dənli paxlalıların əkin sahəsinin 2007-ci ilə nisbətən 22,3% və ya 165,2 min hektar artması ümumi istehsala müsbət təsir edib.

Cari ilin yanvar-mart aylarında isə Azərbaycana xarici ölkələrdən 372 167,6 ton ərzaq buğdası və 17 682 ton un idxal edilib. Buğda idxalı 2008-ci ilin I rübünə nisbətən 46,1%, un idxalı isə 7,8 dəfə artıb.

Xatırladaq ki, bu ilin may ayının 1-dən etibarən Azərbaycana idxal olunan ərzaq buğdası, düyü, buğda və çovdar ununa ƏDV-nin (18%) tətbiqi bərpa olunub.