Aqrar-sənaye kompleksi

«Baltika-Bakı» pivə zavodu rəsmən fəaliyyətə başlayıb

20 may 2009 15:05 (UTC +04:00)

Bakı. Rəşad Süleymanov – APA-Economics. Bu gün «Baltika-Bakı» pivə zavodunun yenidənqurma işlərindən sonra açılışı keçirilib. «APA-Economics»in məlumatına görə, öncə jurnalistlər zavodun yenidənqurmadan sonrakı vəziyyəti ilə tanış olublar. Tədbirdə bildirilib ki, zavodun istehsal sexləri şirkətin bütün zavodlarında olan standartlara və texnoloji tələblərə cavab verir. Daha sonra istehsala rəsmən start verilib. Süzmə xəttində ilk olaraq 0,5 litrlik şüşə butılkalara «Baltika 3 Klassiçiskoye» və yeni 1,5 litrlik PET-butılkalara «Xırdalan» pivəsi süzülüb.

«Baltika-Bakı» şirkətinin istehsal şöbəsinin müdiri Elcan Hüseynov bildirib ki, zavodda yeni istehsal xətti qurulub. Bu xətt 1 saat ərzində 18 min ədəd 1,5 litrlik PET-butılkaya və yaxud 8 min ədəd 2,5 litrlik butılkaya süzmə imkanına malikdir.

Azərbaycanın iqtisadi inkişaf nazirinin müavini Niyazi Səfərov müəssisənin yenidən qurulmasına 20 mln. ABŞ dolları məbləğində investisiya yatırıldığını qeyd edib. Nazir müavini «Baltika-Bakı» şirkətinin gələcəkdə müəssisənin fəaliyyətinin genişləndirilmə planlarının olduğunu da vurğulayıb.

Rusiyanın Azərbaycandakı səfiri Vladimir Doroxin isə bu müəssisənin fəaliyyətinin Rusiya və Azərbaycan arasında iqtisadi əlaqələrin «ən gözəl nümunəsi» adlandırıb: «Düşünürük ki, bunu nümunə götürərək Rusiyanın digər şirkətləri də Azərbaycanda fəaliyyətə maraq göstərəcək. Bu müəssisəyə qoyulan sərmayə Rusiya şirkətləri tərəfindən Azərbaycanın qeyri-neft sektoruna yatırılan ən böyük investisiyadır».

Müəssisədə quraşdırılan bütün avadanlıqlar «Krones AG», «Gea Brewery Systems», «Filtrox AG», «Ring Crown», «Pall GmbH.» və digər şirkətlərin istehsalıdır. Zavodun yenidən qurulmasında «Kaspi», «Mir Yapı» və «Moeller Company» şirkətləri, «Azərinşaatlayihə» layihə institutu iştirak edib.

«Baltika-Bakı» MMC-nin baş direktoru Adam Tlexuray isə qeyd edib ki, planda «Xırdalan», «Bizim Pivə» və «Əfsanə» kimi yerli çeşidləri də inkişaf etdirmək var. Zavodda eyni zamanda «Baltika»nın bütün çeşidləri, «Baltika 3», «Baltika 5», «Baltika 7», «Baltika 9» və «Arsenalnoye» pivələri də buraxılacaq. Cari ildə 5 mln. dekalitr, növbəti illərdə isə 10 mln. dekalitr pivə istehsalı planlaşdırılır. «Baltika-Bakı» Azərbaycanın daxili bazarı ilə yanaşı Gürcüstan və Türkmənistana da məhsul ixracını planlaşdırır.

Ötən ilin nəticələrinə görə, Azərbaycanın pivə bazarında «Baltika» şirkətinin brendləri 73% təşkil edir.

Qeyd edək ki, «Baltika» şirkəti Xırdalan pivə zavodunu 2008-ci ilin may ayında «Brasseries İnternationales Holding (Eastern)» şirkətindən alıb. «Baltika» şirkətinin Rusiyanın 10 şəhərində və Azərbaycanda 1 zavodu var. «Baltika»nın məhsulları dünyanın 50 ölkəsində satılır və Rusiya üzrə ixrac edilən pivənin 70%-i «Baltika»nın payına düşür.