Aqrar-sənaye kompleksi

Azərbaycan kənd təsərrüfatı istehsalını 3% artırıb

18 iyun 2009 12:05 (UTC +04:00)

Bakı. Nicat Mustafayev – APA-Economics. Bu ilin iyun ayının 1-i vəziyyətinə Azərbaycanda 329 min hektar sahədə yazlıq bitkilər əkilib.

Dövlət Statistika Komitəsindən «APA-Economics»ə verilən məlumata görə, buğda istehsalçılarına hər hektar əkin sahəsinə görə dövlət büdcəsi vəsaiti hesabına əlavə yardımın verilməsi 2009-cu ilin məhsulu üçün payızlıq buğdanın əkin sahəsinin xeyli genişləndirilməsi ilə nəticələnib və yazlıq bitkilərin ümumi əkini sahəsi əkin yerinin strukturunda baş vermiş bu dəyişikliyə görə keçən ilə nisbətən bir qədər azalıb. Bununla belə, vələmirin əkin sahəsi keçən ilə nisbətən 18,6%, şəkər çuğunduru - 17,2%, tütün - 3,1%, birillik otlar - 25,5%, yemlik kökümeyvəlilərin əkin sahəsi isə 19% artıb.

Bundan başqa, hesabat tarixinə 8,6 min hektar sahənin taxılı biçilib və hər hektardan 20,9 sentner olmaqla 17,9 min ton taxıl məhsulu götürülüb. Bununla yanaşı, sahələrdən 66,7 min ton kartof, 67,4 min ton tərəvəz və 4,7 min ton meyvə və giləmeyvə məhsulları yığılıb.

Təsərrüfatlarda mineral gübrələrinin istifadə edilməsinin getdikcə artması bitkilərin məhsuldarlığına müsbət təsir göstərib. Belə ki, mövsüm ərzində taxılın hər hektardan orta məhsuldarlığı 20,9 sentner, kartofun məhsuldarlığı 141 sentner, tərəvəzin məhsuldarlığı isə 93,6 sentner olub.

Buna paralel olaraq, yanvar-may aylarında Azərbaycanda diri çəkidə 120 min ton mal-qara və quş əti, 575,2 min ton süd, 500,6 mln. ədəd yumurta və 10,5 min ton yun istehsal edilib. Ötən ilin eyni dövrünə nisbətən mal-qara və quş əti istehsalı 1,7%, süd istehsalı 2,9%, yumurta istehsalı 13,2%, yun istehsalı isə 12,2% artıb.

Hesabat dövründə kənd təsərrüfatının ümumi məhsulunun faktiki qiymətlərlə dəyəri 647,2 mln. manat təşkil edərək keçən ilin eyni dövrünə nisbətən müqayisəli qiymətlərlə 3% artıb.