Aqrar-sənaye kompleksi

Ana səhifə

Azərbaycan hökuməti Taxıl Fondunun saxlanması və istifadəsi qaydalarını təsdiq edib

14 iyul 2009 10:01 (UTC +04:00)

Bakı. Rəşad Süleymanov – APA-Economics. Azərbaycan Nazirlər Kabineti «Dövlət Taxıl Fondunun saxlanması və istifadəsi Qaydaları»nı təsdiq edib. Bu barədə «APA-Economics»ə Nazirlər Kabinetindən məlumat verilib.

Qaydalara əsasən, Fonda taxıl tədarükü Nazirlər Kabinetinin müəyyən etdiyi həcmdə Fövqəladə Hallar Nazirliyi (FHN) tərəfindən daxili və xarici malgöndərənlərlə satınalma müqaviləsinin bağlanması yolu ilə həyata keçiriləcək. Fondda saxlanan taxıl dövlət sifarişçisi tərəfindən sığortalanacaq. Sığorta ilə əhatə olunan risklərin növləri isə FHN tərəfindən Maliyyə Nazirliyi ilə razılaşdırılmaqla müəyyən ediləcək.

Qaydalarda taxılın istifadə istiqamətləri də əksini tapıb. Sənədə əsasən, Fonddan taxılın istifadəsi fövqəladə hallarda istehlakçıların tələbatını ödəmək, beynəlxalq öhdəlikləri yerinə yetirmək və lazım gəldikdə, daxili bazarda taxıl məhsullarının kəskin qiymət dəyişmələrinin qarşısını almaq məqsədi ilə həyata keçirilə bilər. Taxılın istifadəsi üçün qərar Nazirlər Kabineti tərəfindən FHN, İqtisadi İnkişaf və Kənd Təsərrüfatı nazirliklərinin razılaşdırılmış təklifləri əsasında qəbul edilir.

Fonddan taxılın istifadə üçün satılması bazar qiymətlərinə əsasən həyata keçiriləcək. Bu zaman taxılın tədarük qiymətlərindən aşağı qiymətə satılmaması üçün onun qiymətinin ölkədaxili bazar qiymətləri konyunkturasının imkan verdiyi dərəcədə saxlanılması əsas götürülməlidir. Fonddan taxılın istifadəsi daxili bazarda həmin məhsulun kəskin qiymət artımının qarşısının alınması məqsədi ilə həyata keçirildiyi təqdirdə isə, taxıl bazar qiymətlərindən aşağı qiymətə satıla bilər. Beynəlxalq öhdəliklər, o cümlədən humanitar yardımların göstərilməsi ilə əlaqədar Fondda saxlanan taxıldan istifadə olunması barədə qərar qəbul edildikdə, istifadəyə yönəldilən taxılın dəyəri Fonda dövlət büdcəsinin vəsaiti hesabına ödənilməlidir.

Sənəddə taxılın saxlanma, yeniləşdirilmə, Fondun fəaliyyətinin maliyyə təminatı, Fondun saxlanması barədə hesabat və inventarlaşdırması və s. əksini tapıb.