Aqrar-sənaye kompleksi

Azərbaycanda yazlıq bitkilərin əkilməsi ötən ilə nisbətən 12,5% azalıb

17 iyul 2009 12:48 (UTC +04:00)

Bakı. Rəşad Süleymanov – APA-Economics. Cari ilin yanvar-iyun aylarında Azərbaycanda 357 min hektar sahədə yazlıq bitkilər əkilib ki, bu da 2008-ci ildəkindən 12,5% azdır. Bu barədə «APA-Economics»ə Dövlət Statistika Komitəsindən məlumat verilib.

Ümumi əkin sahəsinin azalmasına əsas səbəb keçən ilin payızında cari ilin məhsulu üçün payızlıq dənlilərin əkin sahəsinin xeyli genişləndirilməsi olub. Cari ildə 32 min hektarda (3,5% çox) dənli və dənli paxlalı bitkilər (qarğıdalısız), 1,2 min hektarda (23,2% çox) tütün, 7 min hektarda (17% çox) şəkər çuğunduru səpilib. Ötən il nisbətən birillik otlar və yemlik kökümeyvəlilərin əkin sahələri də genişləndirilib və 4 min hektarda (17% çox) birillik ot, 193 hektarda (2,7% çox) yemlik kökümeyvəlilər səpilib. Bütün bunlarla yanaşı, qarğıdalı, günəbaxan, pambıq, kartof, tərəvəz, ərzaq üçün bostan bitkilərinin və çoxillik otların əkin sahələri keçən ilə nisbətən azalıb.

Operativ məlumatlara görə, iyulun 6-sı vəziyyətinə 1 079,3 min hektar taxıl sahəsinin 651,8 min hektarı və ya ümumi əkin sahəsinin 60,4%-i biçilib. Həmin sahələrdən 1 679,7 min ton məhsul toplanıb. Hər hektardan orta hesabla 25,8 sentner məhsul götürülüb. Keçən ilin müvafiq dövrü ilə müqayisədə 49,7 min hektar çox taxıl sahəsi biçilib, 48,2 min ton çox taxıl məhsulu götürülüb.

Mövsümün əvvəlindən sahələrdən 259,7 min ton və ya keçən ilin müvafiq dövründəkindən 5,2% çox kartof, 271,3 min ton (2,1% az) tərəvəz, 12 min ton (40,3% az) ərzaq üçün bostan məhsulları, 69,3 min ton (1,2% az) meyvə və giləmeyvə toplanıb, quru çəkiyə çevirməklə 24 ton (55,8% çox) tütün yarpağı yığılıb. Çay plantasiyalarından 258,9 ton yaşıl çay yarpağı yığılıb və 2008-ci il iyulun 1-nə nisbətən çay istehsalı 47% artıb.