Aqrar-sənaye kompleksi

Ana səhifə

“Baltika-Bakı” pivə istehsalı zavodu Gürcüstana pivə ixracına başlayıb

20 iyul 2009 15:16 (UTC +04:00)

Bakı. Rəşad Süleymanov – APA-Economics. “Baltika-Bakı” pivə istehsalı zavodu bu gün ilk dəfə Gürcüstana pivə ixracına başlayıb. Bu barədə «APA-Economics»ə «Baltika-Bakı» MMC-nin zavodunun mətbuat xidmətindən məlumat verilib.

Gürcüstana yola salınan 0,5 litrlik butulkada və alümin bankada “Baltika №3 Klassiçeskoye”, “Baltika №9 Krepkoye”, həmçinin 1,5 litrlik PET-qablaşdırmada “Arsenalnoye Tradisionnoye” pivə partiyası dəmir yolu vasitəsilə 5 gün ərzində Tiflisə çatdırılacaq. İlk ixrac partiyasının həcmi 45 min litr təşkil edir.

Zavod Gürcüstana göndərilən pivə çeşidlərini avqust ayında “Baltika Kuler”, “Baltika №5 Zolotoye”, “Baltika №7 Eksportnoye” və 2,5 litrlik PET-qablaşdırmada “Arsenalnoye Tradisionnoye” brendləri hesabına genişləndirmək niyyətindədir.

“Baltika-Bakı” MMC-nin baş direktoru Adam Tlexuray bildirib ki, indi “Baltika” pivəsi Gürcüstan istehlakçıları üçün əlverişli qiymətə olacaq: «“Baltika” şirkətinin Azərbaycandakı zavodundan Gürcüstana pivənin ixrac edilməsinin təşkilinə dair nəqliyyat xərcləri pivənin Rusiyadan çatdırılması ilə müqayisədə xeyli dərəcədə aşağıdır. Bundan əlavə olaraq, məhsulun çatdırılma müddəti də kifayət qədər azdır».

“Pivovarennaya kompaniya “Baltika” ASC 1996-cı ildən Rusiyanın pivə bazarında liderdir. “Baltika” brendi Avropada satış həcminə görə birinci yerdə dayanır. Şirkətinin Rusiyanın 10 şəhərində və Azərbaycanda zavodu var. «Baltika» məhsulları dünyanın 50 ölkəsində satılır, Rusiya üzrə ixrac edilən pivənin 70%-i “Baltika”nın payına düşür. Şirkət 2008-ci il may ayında «Brasseries Internationales Holding (Eastern) Ltd» şirkətindən Xırdalan pivə zavodunu alıb. Zavod 2009-cu ilin əvvəlindən etibarən adını dəyişərək “Baltika-Bakı” olub.