Aqrar-sənaye kompleksi

“Azərbaycanda Kənd İnvestisiya Layihəsi”nin yekunlarına dair mətbuat konfransı keçirilib

21 iyul 2009 10:18 (UTC +04:00)

Bakı. Rəşad Süleymanov – APA-Economics. Bu gün Bakıda Azərbaycan Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyinin həyata keçirdiyi «Azərbaycanda Kənd İnvestisiya Layihəsi»nin (AzKİL) yekunlarına dair mətbuat konfransı keçirilib. «APA-Economics»in məlumatına görə, Dünya Bankının Azərbaycanda ölkə meneceri Qreqori Yedjeyçak bildirib ki, layihə vasitəsi ilə müxtəlif regionlarda icmalara bilik və bacarıqlar aşılanıb. Layihə uğurla yekunlaşdığından, Dünya Bankı ikinci fazanın başlanmasına qərar verib.

Kənd təsərrüfatı nazirinin müavini İlham Quliyev isə bildirib ki, layihə çərçivəsində kənd əhalisi ehtiyaclarını özləri seçib. Ümumilikdə 21 rayonda 340 layihə AzKİL tərəfindən maliyyələşdirilib, 1 milyonadək vətəndaş bu layihələrdən yararlanıb.

Nazirlər Kabinetinin şöbə müdiri Nail Fətəliyev isə deyib ki, Azərbaycan hökuməti bu günədək Dünya Bankı ilə ümumi dəyəri 2 mlrd. 750 mln. ABŞ dolları olan 52 layihə üzrə müzakirələr aparıb. Bunlardan 2 mlrd. 419 mln. dollar dəyərində 48 layihə üzrə kredit sazişləri imzalanıb. Hazırda layihələrdən 23-ü icra olunur.

«Son 3 ildə elə sistem yaranıb ki, layihələrin hazırlanması 6 ay çəkir. Əfsuslar olsun ki, bəzi nazirliklərin icra etdiyi layihələrdə gecikmələr olur», - deyə N. Fətəliyev vurğulayıb.

Layihənin direktoru Sübhan Əsgərov isə AzKİL layihələrinin 340 icmanı əhatə etdiyini qeyd edib. Bu çərçivədə 140 yol, 69 içməli su, 19 məktəb bərpası, 25 suvarma, 43 elektrik təminatının yaxşılaşdırılması, 28 səhiyyə, 2 körpü, 14 drenaj layihəsi maliyyələşdirilib.

AzKİL-in ikinci fazasında isə 250-dək layihənin maliyyələşdirilməsi nəzərdə tutulur.

Qeyd edək ki, AzKİL layihəsinin birinci fazasının ümumi məbləği 21 mln. dollar təşkil edib. Bunun 15 mln. dolları Dünya Bankı tərəfindən 35 illiyə, illik 0,75%-lə ayrılıb. Layihələrdə icmaların payı 10%-dir. Bunun bir hissəsi fiziki əmək, qalan hissəsi isə nağd pul formasında ola bilər.