Aqrar-sənaye kompleksi

Ana səhifə

Azərbaycanda 1 918 673 ton buğda yığılıb

23 iyul 2009 08:37 (UTC +04:00)

Bakı. Rəşad Süleymanov – APA-Economics. Cari ilin iyul ayının 20-nə Azərbaycanda taxıl əkilmiş 976 474 hektar (ümumi sahənin 89%) sahədən 2 557 033 ton məhsul yığılıb.
«APA-Economics»in məlumatına görə, bu barədə cari ilin 6 ayının yekunlarına dair hökumətin iclasında kənd təsərrüfatı naziri İsmət Abasov bildirib. İ. Abasovun sözlərinə görə, buğda əkinlərinin 88%-i (713 532 ha) biçilib, 1 918 673 ton buğda yığılıb.

«Bu il ilk dəfə taxıl istehsalının təxminən 3 mln. ton, o cümlədən buğda istehsalının təxminən 2,2 mln. ton olacağı gözlənilir. Bu, ölkə tarixində taxılçılıq sahəsində ən yüksək nəticə olmaqla yanaşı, əhalinin ərzaq buğdasına olan tələbatının daxili istehsal hesabına tam ödənilməsini təmin edəcək», - deyə İ. Abasov vurğulayıb.

Cari ildə 1 078 800 ha sahədə taxıl, o cümlədən 810 700 ha sahədə ərzaq buğdası əkilib.

Nazir onu da bildirib ki, cari il iyulun 1-nə olan məlumata görə, 66 200 ha sahədə kartof, 79 900 ha sahədə tərəvəz, 31 100 ha sahədə bostan bitkiləri, 1200 ha sahədə tütün və s. əkilib. İndiyədək 260 min ton kartof, 271 300 ton tərəvəz, 69 300 ton meyvə, 12 min ton bostan məhsulları, 24 ton tütün, 259 ton yaşıl çay yarpağı yığılıb.

İ. Abasov bəzi ərzaq məhsullarının saxlanması, ticarət mərkəzlərinə daşınması zamanı normadan xeyli artıq itkiyə məruz qaldığını da qeyd edib: “Meyvə-tərəvəz və kartofun istehsal həcminin əhalinin tələbatından təxminən 2 dəfə artıq olması bu məhsulların tədarükü, saxlanması və satışının təşkilinin dövlət tərəfindən dəstəklənməsinə ehtiyac yaradıb. Bu, əhalinin ilboyu təzə meyvə-tərəvəzlə təmin olunması ilə yanaşı, qiymətlərin tənzimlənməsini həll edə bilər”.