Aqrar-sənaye kompleksi

Ana səhifə

Azərbaycanda soyuducu anbarların inşa olunması 40 mln. manata başa gələcək

31 iyul 2009 11:16 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) ölkənin bir sıra bölgələrində meyvə-tərəvəz və digər ərzaq məhsullarının saxlanması üçün soyuducu anbar komplekslərinin tikintisi ilə məşğul olacaq sahibkar və şirkətləri müəyyənləşdirib.
«APA-Economics»in məlumatına görə, bununla bağlı təşkil olunmuş tədbirdə çıxış edən Azərbaycan iqtisadi inkişaf nazirinin müavini, SKMF-ın Müşahidə Şurasının sədri Niyazi Səfərov qeyd edib ki, hər birinin tutumu 2 min ton olacaq soyuducu anbarlar ölkənin 4 iqtisadi rayonunda (Aran, Quba-Xaçmaz, Gəncə-Qazax və Lənkəran) yaradılacaq: «Bu məsələyə dair sahibkarlar və şirkətlər tərəfindən daxil olmuş təkliflər müsabiqə yolu ilə müəyyənləşdirilib».
Öz növbəsində tədbirdə çıxış edən SKMF-ın icraçı direktoru Şirzad Abdullayev qeyd edib ki, hazırda Azərbaycanda hər il 700 min ton meyvə, 1-1,3 mln. ton tərəvəz istehsal olunur və istehsal əsasən Aran (26%), Quba-Xaçmaz (25%), Gəncə-Qazax (19%) və digər iqtisadi rayonların üzərinə düşür. Ş.Abdullayev onu da bildirib ki, ümumiyyətlə, SKMF-a 33 investisiya təklifi təqdim olunub və bunlardan yalnız 12-nə razılıq verilib. Belə ki, SKMF-ın Müşahidə Şurası Quba-Xaçmaz iqtisadi rayonunda 6, Aran iqtisadi rayonunda 4, Lənkəran və Gəncə-Qazax iqtisadi rayonlarında isə hər birində 1 olmaqla layihələrin maliyyələşdirilməsini qərar qəbul edib: «Layihələrdə iştirak etmək üçün maliyyə vəsaitinin çatışmazlığı ucbatından bir sıra şirkət və sahibkarların xidmətlərindən imtina olunub».
SKMF-ın rəhbəri həmçinin qeyd edib ki, soyuducu anbarların tikintisi üzrə investisiya layihələrinin 70%-dək hissəsi dövlət vəsaiti hesabına maliyyələşdiriləcək. Bundan başqa, sahibkarlar müvəkkil kredit təşkilatlarına da müraciət edə biləcəklər: «Ümumiyyətlə, 12 layihənin ümumi dəyəri 40 mln. manat təşkil edir ki, SKMF tərəfindən sözügedən layihələrin icrasına 24 mln. manat məbləğində vəsait ayrılacaq».
Xatırladaq ki, SKMF bank-agentlərə kreditləri illik 1%, banklar isə sahibkarlara 7%-dən çox olmamaq şərti ilə ayırır. Sahibkarlara güzəştli kreditlərin verilməsi müvəkkil kredit təşkilatı kimi seçilmiş 35 kommersiya bankı, 1 bank olmayan kredit təşkilatı və 4 kredit ittifaqı vasitəsilə həyata keçirilir. Kreditin minimal məbləği 1 000 manat, maksimal məbləği isə 3 mln. manat təşkil edir.
Qeyd edək ki, 2002-ci ildən etibarən SKMF tərəfindən ümumilikdə 350 mln. manatdan artıq güzəştli kredit ayrılıb.