Aqrar-sənaye kompleksi

Ana səhifə

Bu ilin ilk yeddi ayında Azərbaycanda rekord həcmdə taxıl yığılıb

19 avqust 2009 08:12 (UTC +04:00)

Bakı. Nicat Mustafayev – APA-Economics. Bu ilin yanvar-iyul ayları ərzində müəyyən səbəbə görə Azərbaycanda ayrı-ayrı bitkilərin əkin sahəsində azalma olmasına baxmayaraq, dənli və dənli paxlalıların (qarğıdalısız), həmçinin yem bitkilərinin əkin sahəsi xeyli genişləndirilib. Nəticədə, keçən ilə nisbətən ümumi əkin sahəsi 202,9 min hektar və ya 13,5% artıb.

Dövlət Statistika Komitəsindən «APA-Economics»ə verilən məlumata görə, ümumi əkin sahəsinin 1 124,1 min hektarını və ya 66%-ni dənli və dənli paxlalı bitkilər, 40,8 min hektarını (2,4%-ni) texniki bitkilər, 177,5 min hektarını (10,4%-ni) kartof, tərəvəz və bostan bitkiləri, 360,4 min hektarını (21,2%-ni) yem bitkiləri təşkil edib.

Bununla yanaşı, 2009-cu ildə 2008-ci ilə nisbətən buğdanın əkin sahəsinin 202,6 min hektar və ya 33,5% artması dənli və dənli paxlalı bitkilərin ümumi əkin sahəsinin 227,1 min hektar və ya 25,3% artmasına səbəb olub.

Bundan başqa, cari ilin çoxillik otların əkin sahəsinin keçən ilin müvafiq dövrü ilə müqayisədə 18,7% azalmasına baxmayaraq, keçmiş illərin çoxillik otlarının çalım sahəsi ilə birlikdə onların ümumi sahəsi 341,1 min hektardan 350,9 min hektara çatmaqla 9,8 min hektar və ya 2,9% artıb. Yem bitkilərinin 97%-i çoxillik otların payına düşür.

Avqustun 1-i vəziyyətinə ölkədə 1 077,7 min hektar dənli bitkilərin (qarğıdalıdan başqa) sahəsi biçilib döyülmüş və həmin sahələrdən ilkin çəkidə rekord miqdarda – 2 796,5 min ton və ya keçən ildəkindən 21,8% çox taxıl mədaxil edilib. Hər hektardan orta hesabla 25,9 sentner məhsul götürülüb.

Mövsüm ərzində həmçinin təsərrüfatlarda 551,2 min ton kartof, 660,4 min ton tərəvəz, 232,2 min ton bostan məhsulları, 162 min ton meyvə və giləmeyvə, 288,3 ton yaşıl çay yarpağı və s. kənd təsərrüfatı məhsulları toplanıb.

Bundan başqa, cari ilin ötən yeddi ayı ərzində diri çəkidə 171,6 min ton ət, 827,7 min ton süd, 716 mln. ədəd yumurta və 13,2 min ton yun istehsal edilib. Ötən ilin eyni dövrünə nisbətən ət istehsalı 0,2%, süd istehsalı 2,1%, yumurta istehsalı 11,6%, yun istehsalı isə 2,7% artıb.