Aqrar-sənaye kompleksi

Ana səhifə

Azərbaycanda regional taxıl komplekslərini inşa edən şirkətlər sentyabrın 17-də müəyyənləşəcək

02 sentyabr 2009 10:49 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) ölkədə taxıl məhsullarının saxlanılması və təmizlənməsi üçün anbar komplekslərinin yaradılması üzrə sahibkarların təklif etdiyi investisiya layihələrinin zərflərinin açılma prosedurasını keçirib.

«APA-Economics»in məlumatına görə, tədbirdə çıxış edən SKMF-in icraçı direktoru Şirzad Abdullayev bildirib ki, 6 iqtisadi rayon üzrə 26 investisiya layihəsi qəbul olunub. Belə ki, Aran iqtisadi rayonu üzrə 12 layihə, Dağlıq Şirvan iqtisadi rayonu üzrə 2 layihə, Gəncə-Qazax iqtisadi rayonu üzrə 3 layihə, Lənkəran iqtisadi rayonu üzrə 2 layihə, Şəki-Zaqatala iqtisadi rayonu üzrə 4 layihə, Yuxarı Qarabağ iqtisadi rayonu üzrə isə 3 layihə təqdim edilib: «Sentyabrın 17-də SKMF-in Müşahidə Şurasının növbəti iclasında seçilən layihələr elan olunacaq».

Ş.Abdullayev onu da bildirib ki, hazırda Azərbaycanda rekord həddə – 3 mln. ton taxıl istehsal olunub ki, sözügedən taxıl komplekslərinin inşası ərzaq təhlükəsizliyini təmin edəcək. SKMF rəhbəri həmçinin qeyd edib ki, Aran iqtisadi rayonunda ölkənin 30-40% taxılı və ya 1,2 mln. tonu, Şəki-Zaqatala iqtisadi rayonunda 15% (450 min ton), Yuxarı Qarabağ iqtisadi rayonunda isə 11% (300 min ton), Gəncə-Qazax iqtisadi rayonunda 11% (300 min ton), Dağlıq Şirvan iqtisadi rayonunda 9% (260 min ton), Lənkəran iqtisadi rayonunda 7%-i (200 min ton) istehsal olunur.

«İqtisadi rayonlarda taxıl məhsullarının saxlanılması və təmizlənməsi üçün hər birinin tutumu 10 min ton olan, müasir standartlara cavab verən anbar komplekslərinin yaradılması Azərbaycanın kənd təsərrüfatı sahəsinin yeni mərhələyə keçməsini təmin edəcək ki, həmin mərhələ bu sahəni intensiv inkişaf etdirəcək», - deyə Ş.Abdullayev bildirib.

Bundan başqa, Ş.Abdullayev qeyd edib ki, gələcəkdə ehtiyac olarsa, taxıl komplekslərinin yanında çörək sexləri, dəyirman və digər yardımçı obyektlər tikilə bilər.

Qeyd edək ki, investisiya layihələrinin dəyərinin ən azı 30%-i sahibkarların vəsaitləri, qalan hissəsi isə SKMF-in güzəştli kreditləri hesabına maliyyələşdiriləcək.