Aqrar-sənaye kompleksi

Ana səhifə

Azərbaycana cins heyvanların növbəti partiyalarının gətirilməsi ləngiyir

09 sentyabr 2009 07:13 (UTC +04:00)

Bakı. Rəşad Süleymanov – APA-Economics. Azərbaycana xaricdən cins heyvanların növbəti partiyalarının gətirilməsi ilin sonuna qədər ləngiyə bilər. Bu barədə «APA-Economics»ə Kənd Təsərrüfatı Nazirliyindən məlumat verilib.

Yeni heyvanların alınmasının ləngiməsi dövlət büdcəsindən nəzərdə tutulan vəsaitin nazirliyin «Aqrolizinq» ASC-yə ayrılmasındakı ləngimələrlə bağlıdır. Nazirlikdən o da bildirilib ki, Almaniyadan cins inəklərin növbəti partiyasının alınıb Azərbaycana gətirilməsi sentyabr ayının sonuna planlaşdırılırdı. Lakin maliyyə vəsaitinin ayrılmaması səbəbindən heyvanlar ən tez halda noyabr-dekabr aylarında gətirilə bilər.

Qeyd edək ki, Almaniyadan cins inəklərin ilk partiyası Azərbaycana 2009-cu ilin yanvar ayında gətirilib. Yay mövsümündə havaların isti keçməsi ilə əlaqədar heyvanların alınıb ölkəyə gətirilməsinə müvəqqəti fasilə verilib.

«Aqrolizinq» ASC vasitəsi ilə Almaniyadan Azərbaycana əsasən şvis, qara-ala, Holstin-Friz və Sim-mental cinsli inəklər gətirilir. Həmin heyvanlar 20 günlük karantindən sonra fermerlərə satılır.

Heyvanları «Aqrolizinq» ASC-nin elan etdiyi tenderdə qalib gəlmiş Böyük Britaniyanın «Rista Alliance» şirkəti gətirir. Heyvanların qiymətinin 50%-i dövlət tərəfindən güzəşt olunur. Fermerlər qalan 50% vəsaitin yarısını əvvəlcədən, qalan hissəsini isə 3 il ərzində hissə-hissə ödəməlidir.

Almaniyadan alınmış 1 heyvanın qiyməti 3600-3800 manat arasındadır.