Aqrar-sənaye kompleksi

Ana səhifə

Azərbaycanda 20 regional taxıl anbarı inşa olunacaq

17 sentyabr 2009 10:50 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) ölkənin bir sıra bölgəsində taxıl məhsullarının saxlanması və təmizlənməsi üçün anbar komplekslərinin tikintisi ilə məşğul olacaq sahibkar və şirkətləri müəyyənləşdirib.

«APA-Economics»in məlumatına görə, bununla bağlı təşkil olunmuş tədbirdə çıxış edən SKMF-in icraçı direktoru Şirzad Abdullayev qeyd edib ki, hər birinin tutumu 10 min ton olacaq müasir standartlara cavab verən taxıl anbar kompleksləri ölkənin 6 iqtisadi rayonunda (Aran, Dağlıq Şirvan, Gəncə-Qazax, Lənkəran, Şəki-Zaqatala və Yuxarı Qarabağ) yaradılacaq.

Ş.Abdullayev həmçinin bildirib ki, ümumiyyətlə SKMF-a 26 investisiya təklifi təqdim olunub və bunlardan yalnız 20-nə razılıq verilib. Belə ki, SKMF-in Müşahidə Şurası Aran iqtisadi rayonunda 9, Yuxarı Qarabağ iqtisadi rayonunda 3, Dağlıq Şirvan, Gəncə-Qazax, Lənkəran, Şəki-Zaqatala iqtisadi rayonlarının hər birində 2 kompleksin yaradılmasının maliyyələşdirilməsini qərara alıb: «Taxıl anbar komplekslərinin tikintisi üzrə investisiya layihələrinin bir hissəsi dövlət vəsaiti hesabına maliyyələşdiriləcək. Ümumiyyətlə, 20 layihənin ümumi dəyəri 38,5 mln. manat təşkil edir ki, Fond tərəfindən sözügedən layihələrin icrasına 17 mln. manat məbləğində vəsait ayrılacaq».

Ş.Abdullayevin sözlərinə görə, yaradılacaq anbarlar ölkənin taxıl istehsalı potensialını daha da artıracaq və fermerlərə stimul yaradacaq.