Aqrar-sənaye kompleksi

Ana səhifə

Azərbaycan bu il taxıl istehsalını 21% artırıb

17 sentyabr 2009 12:51 (UTC +04:00)

Bakı. Nicat Mustafayev – APA-Economics. Bu ilin sentyabr ayının 1-i vəziyyətinə Azərbaycanda 1 091,4 min hektar dənli və dənli paxlalı bitkilərin sahəsi biçilib döyülüb və həmin sahələrdən ilkin çəkidə 2 831,8 min ton taxıl toplanıb, hər hektardan orta hesabla 25,9 sentner məhsul götürülüb.

Dövlət Statistika Komitəsindən «APA-Economics»ə verilən məlumata görə, nəticədə dənli və dənli paxlalı bitkilərin biçilmiş sahəsi ötən ilin eyni dövrü ilə müqayisədə 21,2%, toplanılan taxılın həcmi 21,4% artıb, hər hektardan götürülən məhsulun həcmi isə 4,4% azalıb.

Hesabat dövründə yığılmış məhsulun 2 137,5 min tonu payızlıq və yazlıq buğda məhsulu olub.

Dənli və dənli paxlalılardan fərqli olaraq dən üçün qarğıdalı yığımı davam edir, yığılacaq sahənin yalnız 38,3%-nin və yaxud 12,1 min hektarından qıçaları quru dənə çevirməklə 52,6 min ton qarğıdalı toplanıb. Qarğıdalı nəzərə alınmaqla ölkə üzrə taxıl istehsalı keçən ilin müvafiq dövrü ilə müqayisədə 484,2 min ton və yaxud 20,2% artaraq rekord səviyyəyə - 2 884,4 min tona çatıb. Ötən ilə nisbətən payızlıq və yazlıq dənli və dənli paxlalıların (qarğıdalısız) əkin sahəsinin 230,3 min hektar artması ümumi istehsala müsbət təsir edib.

Bununla yanaşı, mövsüm ərzində təsərrüfatlarda 672,9 min ton kartof, 11,1 min ton günəbaxan, 943,8 min ton tərəvəz, 359,2 min ton bostan məhsulları, 267,2 min ton meyvə və giləmeyvə və 23,4 min ton üzüm, 1 347 ton tütün yarpağı və 303,6 ton yaşıl çay yarpağı toplanıb.

Bundan başqa, sentyabrın 7-si vəziyyətinə Azərbaycanda 427 ton xam pambıq yığılıb emal müəssisələrinə satılıb. Cari ilin məhsulu üçün pambığın əkin sahəsi keçən ilə nisbətən 27,4 min hektar və ya 56,5% azalıb.

Cari ilin səkkiz ayı ərzində diri çəkidə 194,2 min ton və ya keçən ilin müvafiq dövrünə nisbətən 0,6% çox ət, 941,5 min ton və ya 2% çox süd, 803,3 mln. ədəd və ya 10,2% çox yumurta istehsal edilib, həmçinin 13,4 min ton və ya 2,7% çox yun qırxılıb.

Yanvar-avqust aylarında kənd təsərrüfatının ümumi məhsulunun sabit qiymətlərlə dəyəri keçən ilin müvafiq dövrü ilə müqayisədə 3,8%, o cümlədən bitkiçilik məhsulları üzrə 4,7%, heyvandarlıq məhsulları üzrə isə 2,1% artıb.

Sentyabrın 1-i vəziyyətinə Azərbaycanın meşəçilik təsərrüfatlarında istehsal edilmiş məhsul və xidmətlərin faktiki qiymətlərlə dəyəri 890 min manat olub. Balıqçılıqla məşğul olan təsərrüfatlar tərəfindən isə 92 min manat dəyərində balıq ovlanıb.