Aqrar-sənaye kompleksi

Ana səhifə

Azərbaycan Nazirlər Kabineti arıçılıqla bağlı bir neçə normativ hüquqi aktı təsdiqləyib

24 sentyabr 2009 11:45 (UTC +04:00)

Bakı. Rəşad Süleymanov – APA-Economics. Azərbaycan Nazirlər Kabineti arıçılıqla bağlı bir neçə normativ hüquqi aktı təsdiq edib. Bu barədə «APA-Economics»ə Nazirlər Kabinetindən məlumat verilib.

Bunlar «Xarici ölkələrdə arıçılıqda istifadə olunmuş inventar və avadanlıqların Azərbaycan Respublikasının ərazisinə idxalının məhdudlaşdırılması halları və Qaydası», «Arı ailələrinin zərərvericiləri ilə mübarizə tədbirlərinin həyata keçirilməsi Qaydası» və «Arı ailələrinin balyığma və yeni məskunlaşma yerlərinə köçürülməsi Qaydası»dır.

«Xarici ölkələrdə arıçılıqda istifadə olunmuş inventar və avadanlıqların Azərbaycan Respublikasının ərazisinə idxalının məhdudlaşdırılması halları və Qaydası»na əsasən digər ölkələrdən arıçılıqda istifadə olunmuş inventar və avadanlıqlar Azərbaycana gətirilərkən gömrük rüsumlarının dərəcələri "Gömrük tarifi haqqında" qanuna əsasən müəyyən olunur. Təhlükəli və yoluxucu arı xəstəlikləri olan ölkələrdən, habelə istifadə müddəti başa çatmış, istifadəyə yararsız inventar və avadanlıqların idxalına icazə verilməyəcək. İdxal olunan istifadə edilmiş inventar və avadanlıqların sağlam təsərrüfatlarından gətirilməsinə dair ixrac edən ölkənin dövlət baytarlıq orqanının rəyi olmalıdır.

«Arı ailələrinin zərərvericiləri ilə mübarizə tədbirlərinin həyata keçirilməsi Qaydası» arı ailələrini sağlam və məhsuldar saxlamaq üçün ziyanvericilərə qarşı aparılan profilaktik mübarizə və müalicə tədbirlərinin təşkilini əhatə edir.

«Arı ailələrinin balyığma və yeni məskunlaşma yerlərinə köçürülməsi Qaydası»nda isə arı ailələrinin qida toplaması və yeni məskunlaşma yerlərinə köçürülməsinə dair vacib şərtlər əksini tapıb. Qaydalara əsasən arı ailələri köçürüldükdə, arı cinslərinin və onların populyasiyalarının rayonlaşdırılması planına riayət olunmalıdır.