Aqrar-sənaye kompleksi

Ana səhifə

Gələn həftə Azərbaycanda beynəlxalq aqrar sərgisi keçiriləcək

02 oktyabr 2009 10:12 (UTC +04:00)

Bakı. Rəşad Süleymanov – APA-Economics. Oktyabrın 6-dan 9-dək Bakıda «Caspian Agro -2009» adlı beynəlxalq sərgi keçiriləcək. «APA-Economics»in bildirdiyinə görə, bu barədə sərginin təşkilat komitəsinin bu gün keçirdiyi mətbuat konfransında məlumat verilib.

Kənd təsərrüfatı nazirinin müavini İlham Quliyev bildirib ki, sərginin keçirilməsində məqsəd ölkədə istehsal edilən kənd təsərrüfatı və emalı sənaye məhsullarını, qabaqcıl aqrar elmin nailiyyətlərini və təcrübəsini nümayiş etdirmək, xarici şirkətləri Azərbaycana investisiya qoyuluşuna təşviq etməkdir.

İ.Quliyevin sözlərinə görə, sərgi çərçivəsində biznes-forumun keçirilməsi də planlaşdırılır, 80-dən artıq şirkət isə sərgidə iştiraka razılıq verib.

Bununla yanaşı sərgidə Belarus, Litva, İtaliya və Ukraynanın aqrar sahə nazirlərinin, İordaniyadan nazir müavininin, Qətər və Koreyadan aqrar nazirliklərin idarə rəislərinin, Almaniya və Rusiyadan isə hər biri 25 iş adamından ibarət nümayəndə heyətlərinin iştirakı gözlənilir.

Sərgidə Latviya, Belarus və Suriya öz milli stendləri ilə təmsil olunacaq.

Azərbaycan Ticarət və Sənaye Palatasının vitse-prezidenti Mehman Əhmədov isə bildirib ki, sərgi Palata tərəfindən Kənd Təsərrüfatı Nazirliyi və İqtisadi İnkişaf Nazirliyinin rəsmi dəstəyi ilə təşkil olunur. Sərgidə iştirak edəcək 80 şirkətdən 50-si Azərbaycan, qalanları isə xarici şirkətlərdir. Sərgidə xarici ölkələrdən ən çox təmsilçi ilə – 20 şirkət olmaqla Almaniya təmsil olunacaq. Sərgi Bakıda Heydər Əliyev adına İdman-Konsert Kompleksində keçiriləcək.