Aqrar-sənaye kompleksi

Ana səhifə

Bakıda Almaniya-Azərbaycan Aqrar İqtisadi Forumu keçirilib

05 oktyabr 2009 09:41 (UTC +04:00)

Bakı. Nicat Mustafayev – APA-Economics. Bu gün Almaniya-Azərbaycan İqtisadi Birliyinin (DAWF) təşkilatçılığı ilə Bakıda I Almaniya-Azərbaycan Aqrar İqtisadi Forumu və Əməkdaşlıq Birjası keçirilib.

«APA-Economics»in məlumatına görə, tədbir Almaniya Ərzaq, Kənd Təsərrüfatı, İstehlakçıların Hüquqlarının Qorunması Nazirliyinin şöbə müdiri Dietrix Quthun rəhbərliyi altında sahibkarlardan ibarət nümayəndə heyətinin Azərbaycana səfəri çərçivəsində keçirilib.

Tədbirin açılış mərasimində çıxış edən Almaniyanın Azərbaycandakı səfiri Per Stankina hər iki ölkəyə uzunmüddətli əməkdaşlıq tövsiyə edib: «Azərbaycanda ÜDM-in müsbət göstəriciləri Almaniya sahibkarları üçün böyük əhəmiyyət kəsb edir. Maliyyə böhranı dövründə belə Azərbaycanın iqtisadi inkişaf və bütün sahələrdə müsbət göstəricilər əldə etməsi bu ölkədə biznes mühitinin əlverişli olduğunu göstərir».

Səfir həmçinin qeyd edib ki, hazırda Almaniya Azərbaycana aqrar texnikanın idxal olunması sahəsində lider yeri tutur.

D.Qut bildirib ki, Azərbaycan Avropa ilə Asiya arasında körpü rolu oynayır və Almaniya üçün bu amil böyük əhəmiyyət kəsb edir: «Biz Azərbaycanla kənd təsərrüfatı sahəsində əməkdaşlığı genişləndirmək niyyətindəyik».

İki ölkə arasında aqrar-sənaye kompleksində əməkdaşlığın tarixindən danışan D.Qut həmçinin qeyd edib ki, əgər 2001-ci ildə qida məhsulları üzrə iki ölkə arasında ticarət dövriyyəsi 10,3 mln. avro təşkil edirdisə, artıq 2008-ci ildə bu rəqəm 89 mln. avroya çatıb: «Ümumiyyətlə, ticarət dövriyyəsini artırmaq üçün hər iki ölkənin potensialı yüksəkdir».

Tədbirdə çıxış edən Azərbaycanın kənd təsərrüfatı nazirinin müavini Bəhram Əliyev bildirib ki, ölkələr arasında əməkdaşlıq, o cümlədən kənd təsərrüfatı sahəsində ilbəil artır. Azərbaycanın aqrar-sənaye kompleksinin inkişafından danışan nazir müavini qeyd edib ki, 1995-ci ildən etibarən bu sahə inkişafa başlayıb və son 5 il ərzində kənd təsərrüfatı sahəsi daha da inkişaf edib: «Ümumiyyətlə, son dövr ərzində Azərbaycanın kənd təsərrüfatı istehsalı artıb. Ötən il Almaniya ilə Azərbaycan arasında kənd təsərrüfatı sahəsində ticarət dövriyyəsi 804 mln. ABŞ dolları təşkil edib ki, bunun da 112 mln. dolları Azərbaycandan Almaniyaya ixrac olunan kənd təsərrüfatı məhsulları olub».

Qeyd edək ki, tədbirdə kənd təsərrüfatı sahəsində fəaliyyət göstərən 20-dən artıq Almaniya və 100-ə yaxın Azərbaycan şirkətinin nümayəndələri iştirak edib. Tədbir çərçivəsində Azərbaycan və Almaniya iş adamları arasında ikitərəfli görüşlər keçirilib.