Aqrar-sənaye kompleksi

Ana səhifə

Azərbaycan və Koreya kənd təsərrüfatı sahəsində əməkdaşlıq memorandumu imzalayıb - FOTO

Azərbaycan və Koreya kənd təsərrüfatı sahəsində əməkdaşlıq memorandumu imzalayıb - <font color=red>FOTO</font>

08 oktyabr 2009 10:48 (UTC +04:00)

Bakı. Rəşad Süleymanov – APA-Economics. Bu gün Azərbaycanın kənd təsərrüfatı naziri İsmət Abasov Bakıda səfərdə olan Koreyanın Ərzaq, Kənd Təsərrüfatı, Meşəçilik və Balıqçılıq Nazirliyinin baş direktoru Kim Jonq Jinin rəhbərlik etdiyi nümayəndə heyəti ilə görüşüb. «APA-Economics»in bildirdiyinə görə, İ.Abasov Azərbaycanın kənd təsərrüfatı sektorunda həyata keçirilən islahatlar, əldə olunmuş nailiyyətlər barədə məlumat verib. Bu günlərdə Koreyanın Azərbaycandakı səfiri ilə görüşdüyünü deyən İ.Abasov səfir tərəfindən Koreya iş adamlarının Azərbaycana investisiya yatırmaq niyyətində olmaları barədə təklifin səsləndirildiyini qeyd edib.

K.J.Jin isə ölkələr arasında kənd təsərrüfatı sahəsində imzalanacaq sənədlərin gələcək əməkdaşlığa təsir göstərəcəyini və yeni əməkdaşlıq istiqamətinin yaradılacağını qeyd edib: «Biz Azərbaycanın kənd təsərrüfatı sektorunda böyük potensial olduğunu düşünürük. Əminəm ki, bundan sonra bu sahədə əlaqələrimiz daha inkişaf edəcək».

Daha sonra Azərbaycan ilə Koreya arasında kənd təsərrüfatı sahəsində əməkdaşlıq haqqında memorandum imzalanıb. Sənəd çərçivəsində təcrübə və məlumat, qarşılıqlı maraq kəsb edən sahələrdə ekspert mübadilələrinin aparılması, kənd təsərrüfatı sahəsində birgə tədbirlər, özəl sektorda əməkdaşlığın, ticarətin və investisiyaların təşviqi və s. məsələlər əksini tapıb. Memoranduma uyğun olaraq, tərəflər ikitərəfli əməkdaşlığı koordinasiya və inkişaf etdirmək məqsədi ilə Kənd təsərrüfatı əməkdaşlığı üzrə Azərbaycan-Koreya Komitəsini təsis edəcək. Bu komitədə dövlət və qeyri-dövlət təşkilatlarının nümayəndələri təmsil olunacaq.

Nazir İ.Abasov jurnalistlərə açıqlamasında bildirib ki, Koreya iş adamlarından ibarət nümayəndə heyəti Azərbaycana gələcək: «Burada onlara Azərbaycanın kənd təsərrüfatı potensialı barədə təqdimatlar keçiriləcək. Bundan sonra Koreya iş adamları hansı sahələrdə fəaliyyət göstərməyə maraqlı olduqlarını bildirəcəklər. Eyni zamanda azərbaycanlı iş adamlarının Koreyaya tanışlıq səfərləri təşkil olunacaq. Bu səfərlər çərçivəsində aqroforumların keçirilməsi də planlaşdırılır».

İ.Abasov onu da bildirib ki, Azərbaycan tərəfi Koreyanın aqrar sənayesində fəaliyyət göstərən şirkətləri kənd təsərrüfatı məhsullarının emal sənayesinə cəlb etmək niyyətindədir.

Nazir onu da vurğulayıb ki, Azərbaycan tərəfi də öz növbəsində istehsal etdiyi bir sıra kənd təsərrüfatı məhsullarını Koreya bazarına ixrac etmək istəyir.