Aqrar-sənaye kompleksi

Ana səhifə

Azərbaycan bu il taxıl istehsalını 20% artırıb

21 oktyabr 2009 11:54 (UTC +04:00)

Bakı. Nicat Mustafayev – APA-Economics. Bu ilin oktyabr ayının 1-i vəziyyətinə Azərbaycanda 1 093,3 min hektar taxıl sahəsi (qarğıdalısız) biçilib döyülüb və həmin sahələrdən ilkin çəkidə 2 835,9 min ton taxıl məhsulu götürülüb.

Dövlət Statistika Komitəsindən «APA-Economics»ə verilən məlumata görə, hər hektarın orta məhsuldarlığı əvvəlki ilə nisbətən 1,2 sentner azalaraq 25,9 sentnerə enib. Bundan başqa, cari ildə 26,8 min hektar qarğıdalı sahəsindən qıçaları quru dənə çevirməklə 129,5 min ton məhsul toplanıb, hər hektardan orta hesabla 48,4 sentner qarğıdalı dəni götürülüb. Qarğıdalı dəni nəzərə alınmaqla taxıl istehsalının ümumi həcmi keçən ilə nisbətən 19,5% və yaxud 484,2 min ton artaraq 2 965,4 min tona çatıb. Taxılın 72,1%-ni və ya 2 137,5 min tonunu buğda təşkil edir.

Mövsüm ərzində sahələrdən həmçinin 892,9 min ton kartof, 1 104,5 min ton tərəvəz və 406,4 min ton bostan məhsulları toplanıb. Keçən ilin müvafiq dövrünə nisbətən kartof istehsalı 13,1%, tərəvəz istehsalı 2,9% azalıb, bostan məhsulları istehsalı isə 0,4% artıb. Eyni zamanda, hektarın orta məhsuldarlığı kartof üzrə 8 sentner azalıb, tərəvəz üzrə 1 sentner, bostan məhsulları üzrə 3 sentner artıb və müvafiq olaraq 145 sentner, 142 sentner və 131 sentner olub.

Ötən ilə nisbətən cari ildə pambığın əkin sahəsinin 56,5% azalması məhsul istehsalında da özünü göstərib. Belə ki, oktyabrın 1-i vəziyyətinə emal müəssisələrinə 6,2 min ton xam pambıq yığılıb satılıb.

Pambıqçılıqdan fərqli olaraq tütünçülük sahəsində canlanma müşahidə olunub. Belə ki, əkin sahəsinin 12,6% artması tütün yarpağı istehsalının 6,2% artmasına səbəb olub və qurudulmuş çəkidə 1,8 min ton tütün yarpağı yığılıb.

Bundan başqa, 2009-cu ildə 7,6 min hektar sahədə emal üçün şəkər çuğunduru əkilib. Hazırda məhsulun yığımına başlanılıb və hesabat tarixinə kimi 265 hektar sahənin çuğunduru çıxarılıb və həmin sahələrin hər hektarından 296 sentner olmaqla 7,8 min ton məhsul götürülüb.

Cari ildə meyvə və üzüm məhsulu keçən ildəki səviyyədən bir qədər artıq olub. Belə ki, hesabat tarixinə 414,2 min ton və yaxud keçən ildəkindən 279 ton çox meyvə və giləmeyvə, 76,8 min ton və yaxud 372 ton çox üzüm məhsulu toplanıb. Yaşıl çay yarpağı yığımı isə 28,7% artaraq 360,1 tona çatıb.

Heyvandarlıq məhsulları istehsalı sahəsində cari ilin doqquz ayı ərzində diri çəkidə 227,2 min ton ət, 1 075,8 min ton süd, 896 mln. ədəd yumurta və 14,4 min ton yun istehsal edilib. Keçən ilin müvafiq dövrü ilə müqayisədə ət istehsalı 0,5%, süd istehsalı 2,6%, yumurta istehsalı 9,7%, yun istehsalı isə 3,4% artıb.

Yanvar-sentyabr aylarında kənd təsərrüfatının ümumi məhsulunun faktiki qiymətlərlə dəyəri 2 870,1 mln. manat olub, 2008-ci ilin doqquz ayı ilə müqayisədə 2,9%, o cümlədən heyvandarlıq məhsulları istehsalı 2,2%, bitkiçilik məhsulları istehsalı 3,3% artıb.

Qeyd edək ki, oktyabrın 1-i vəziyyətinə ölkənin meşəçilik təsərrüfatlarında istehsal edilmiş məhsul və xidmətlərin faktiki qiymətlərlə dəyəri 1 066 min manat olub. Balıqçılıqla məşğul olan təsərrüfatlar tərəfindən isə 111 min manat dəyərində balıq ovlanıb.