Bakı. Anaxanım Hidayətova - APA. Bakıda təşkil edilən BMT Təhlükəsizlik Şurasının Beynəlxalq Model Konfransı öz işini davam etdirir.
APA-nın məlumatına görə, konfrans öncəsi təlim seminarından sonra iştirakçılar bu gün Azərbaycan Diplomatik Akademiyasında (ADA) BMT Təhlükəsizlik Şurasının simulyasiyasını həyata keçirmək üçün rol oyununa start veriblər.
Tədbirdə ADA-nın icraçı prorektoru Fariz İsmayılzadə model konfransın Azərbaycan üçün əhəmiyyətindən bəhs edərək iştirakçılara uğurlar arzulayıb.
İki gün davam edəcək simulyasiya oyununda tədbir iştirakçıları kiber-təhlükəsizlik mövzusu ətrafında debatlara qoşulacaq, yaranmış böhran üzrə qətnamələr qəbul edəcək və problemin həlli yolları üçün ümumi çərçivəni müəyyənləşdirməyə səy göstərəcəklər. Model Konfransın obyekti kiber-təhlükəsizliyin pozulması səbəbindən böhranla üzləşmiş "Afrikada yerləşən Tobanqo" ölkəsidir. Razılaşdırılmış sülh planının bəzi müddəalarının ictimaiyyətə sızması ilə ölkədə gedən vətəndaş müharibəsi daha da qızışıb və Təhlükəsiz Şurana üzv ölkələrdən həmin böhranın həlli yollarının tapılması tələb olunur. Bu model Şura real BMT Təhlükəsizlik Şurası kimi günün istənilən saatında toplaşa, müzakirələr keçirə və müvafiq qərarlar verə bilər.
Təhlükəsizlik Şurasının prezidentlik vəzifəsi beynəlxalq ekspert xanım Hannah Musaya həvalə edilib. Müzakirələrinin nəticəsində məsələ ilə bağlı yekun qətnamə veriləcəyi və onun səsə qoyulacağı gözlənilir. Rəsmi bağlanış mərasimində konfrans iştirakçıları beynəlxalq dərəcəli sertifikatla təltif ediləcəklər. Bundan sonra BMT Təhlükəsizlik Şurasını təmsil edən ölkələrin mədəniyyət gecəsi keçiriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
