Bakı. Vüsal Nəbiyev – APA-Economics. İslam Əməkdaşlıq Təşkilatının (İƏT) əmək nazirlərinin Cakartada (İndoneziya) keçirilən III konfransında Azərbaycan nümayəndə heyətinin üzvü, Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəisi Fuad Əlizadə əmək nazirliklərinin yüksək səviyyəli rəsmilərinin iclasında müzakirə olunan və razılıq əldə edilən məsələlərin yekunu barədə məruzə edib.
Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, F.Əlizadə İƏT-ə üzv ölkələrdə əmək bazarı, gənclərin məşğulluğu, əməyin təhlükəsizliyi və sağlamlığı vəziyyəti ilə bağlı təqdimatların edildiyini və bu istiqamətdə müzakirələrin aparıldığını bildirib. O, qeyd edib ki, İƏT əmək nazirlərinin iki il bundan öncə Bakıda keçirilən II konfransında qəbul edilən Əmək, Məşğulluq və Sosial Müdafiə sahəsində əməkdaşlıq üzrə çərçivə sənədinin icrası sahəsində həyata keçirilən fəaliyyət, o cümlədən SESRİC (İslam Ölkələrinin Statistika, İqtisadi və Sosial araşdırma və Təlim Mərkəzi) və İslam İnkişaf Bankı tərəfindən bu yöndə görülən işlər yüksək qiymətləndirilib. İƏT-in Əməyin təhlükəsizliyi və sağlamlığının qorunması üzrə şəbəkəsinin, habelə məşğulluq xidmətləri şəbəkəsinin fəaliyyəti təqdirəlayiq hesab olunub.
F.Əlizadə diqqətə çatdırıb ki, iclasda İƏT ölkələri arasında təlim və kadr potensialının gücləndirilməsi sahəsində tərəfdaşlığın möhkəmləndirilməsi, İİB-nın üzv ölkələrdə gənclərin məşğulluğunun dəstəklənməsi üzrə proqramlarda iştirakı, istehsalatda bədbəxt hadisələrin qarşısının alınması üçün milli normativlərin təkmilləşdirilməsində təcrübə mübadiləsinin zəruriliyi və s. məsələlər müzakirə olunub: “Bununla yanaşı, təşkilata üzv dövlətlərin Əmək, Məşğulluq və Sosial Müdafiə sahəsində əməkdaşlıq üzrə çərçivə sənədi ilə bağlı fəaliyyət planının həyata keçirilməsi üçün 2015-2017-ci illər üzrə rəhbər komitənin tərkibinin İndoneziya, Cibuti, Seneqal, Fələstin, Azərbaycan, Səudiyyə Ərəbistanı, Banqladeş, Burkina Faso və növbəti IV konfransın keçiriləcəyi ölkədən ibarət olması qərara alınıb”. F.Əlizadə toplantıda İƏT-in Bakıda Əmək Mərkəzinin yaradılması ilə bağlı təsis sənədlərinin də müzakirə olunduğunu və tam dəstəkləndiyini bildirib.
Xidmət rəisi 2016-cı ildə İndoneziyada İƏT-ə üzv ölkələrin nümayəndələrinin iştirakı ilə məşğulluq məsələləri ilə bağlı təlim seminarının keçirilməsi, əmək nazirlərinin növbəti IV konfransının keçiriləcəyi vaxtın və yerinin müəyyən olunması üçün İƏT katibliyi tərəfindən müvafiq məsləhətləşmələrin aparılması və s. barədə qərarlar qəbul olunduğunu da qeyd edib.
Xatırladaq ki, İƏT-in əmək nazirlərinin III konfransında əmək və əhalinin sosial müdafiəsi naziri Səlim Müslümovun başçılıq etdiyi nümayəndə heyəti iştirak edib. S.Müslümov tədbirdə ölkəmizdə sosial-iqtisadi inkişaf şəraitində əhalinin sosial müdafiəsinin gücləndirilməsi, məşğulluq səviyyəsinin istiqamətlərində həyata keçirilən məqsədyönlü tədbirlər barədə ətraflı məlumat verib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
