Bakı-APA. Banqladeşdə 1971 ildə hərbi cinayətlər törətmiş “Cəmaəti İslami” radikal qruplaşmanın liderlərindən biri olan Mir Qasım Əli barəsində məhkəmənin çıxardığı edam hökmü icra olunub.
APA-nın “Assoşieyted Press”ə istinadən verdiyi xəbərə görə, məhkəmə avqustun 30-da Mir Qasım Əlinin ölüm hökmünə verdiyi apelyasiya şikayətini təmin etməyib. Bundan əvvəl, martda, Banqladeş Ali Məhkəməsi 2014-cü ildə verilmiş edam hökmünü qüvvədə saxlayıb.
Mir Qasım qətl törətməkdə, işgəncələr verməkdə, müharibə dövründə dini ədavət yaratmaqda ittiham olunub.
Edam hökmü yerli vaxtla 22.30-da (Bakı vaxtı ilə 20.30-da) ölkənin mərkəzi həbsxanasında asılmaqla icra edilib.
Qeyd edək ki, “Cəmaəti İslami” radikal qruplaşmanın 71 yaşlı lideri Moti ür-Rəhman Nizami bu ilin mayın 11-də edam olunub.
Banqladeşin müstəqilliyi uğrunda müharibə 1971-ci ildə Qərbi Pakistan (indiki Pakistan) və Şərqi Pakistan (indiki Banqladeş) arasında aparılıb. Nəticədə Şərqi Pakistan Banqladeş adı altında müstəqilliyini elan edib.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
