Bakı. Real Cəfərli – APA. “İranın gələcək prezidenti ölkədəki iqtisadi-siyasi problemlərin, eyni zamanda sanksiyaların aradan qaldırılması üçün həll yolları tapmalıdır”. APA-nın “Mehr” xəbər agentliyinə istinadən məlumatına görə, bunu İran Konstitusiyasına Nəzarət Şurasının (Şura-ye Negəhban) rəhbəri, ayətullah Əhməd Cənnəti bildirib.
Onun sözlərinə görə, yeni seçiləcək ölkə prezidenti ən əsas iki xüsusiyyətə sahib olmalıdır: “Bu da “iman” və “təqva”dır. İmansız və təqvasız olan bir idarəçi yolundan azaraq gizli işlərlə məşğul olacaq”.
Ə.Cənnəti bəzi prezidentliyə namizədlərin İrana qarşı tətbiq edilmiş sanksiyaların aradan qaldırılması üçün ABŞ-la birbaşa müzakirələr aparmaqla bağlı səsləndirdiyi fikirləri zarafat adlandırıb: “İllərdir ABŞ-ın qanadları altında olan ölkələrdə problemlər yaşanır. Çünki ABŞ heç kimin xeyrinə işləmir. Ona görə də ABŞ-a təslim olmaq ölkənin mənfəətlərinin və məsələlərinin əcnəbilərin ixtiyarına vermək mənasına gəlir”.
İran rəsmisi 2009-cu il prezident seçkiləri zamanı ölkədə baş vermiş hadisələrə də toxunub və ad çəkmədən İran Məsləhət Şurasının sədri, eks-prezident Əli Əkbər Haşimi Rəfsəncaniyə eyham vurub: “İranda 2009-cu ildə saxtakarlıq adı altında hakimiyyəti devirməyə cəhd göstərdilər. İndi prezident kreslosuna oturmaq istəyən bəzi namizədlər 2009-cu il hadisələri ilə bağlı mövqelərinə aydınlıq gətirməlidirlər”.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
