Asiya

Ana səhifə

Asiya

İran və Türkiyə xarici işlər nazirləri arasında görüş keçirilib

06 yanvar 2014 10:59 (UTC +04:00)

APA-nın İran mətbuatına istinadən verdiyi məlumata görə, hər iki nazir daha sonra təxminən bir saat davam edən və ictimaiyyətə qapalı keçirilən görüşün detallarını açıqlamaq üçün birgə mətbuat konfransı keçiriblər.

M.C.Zərif bildirib ki, görüşdə ikitərəfli əlaqələrlə yanaşı, regional mövzular ətrafında fikir mübadiləsi aparılıb: «Bölgədə mühüm və təsiredici rola malik iki ölkənin əlaqələrini inkişaf etdirməsi, fikir mübadiləsi aparması və rəsmilər arasındakı görüşlərin davamlı olmasının həssas bir region üçün əhəmiyyətli və zəruri olduğuna inanırıq. İran və Türkiyənin fikirlərini şəffaf və açıq bir şəkildə ortaya qoyması, ortaq nöqtələrdə əməkdaşlıq etməsi, fikir ayrılıqları olan mövzuları da sədaqət, dostluq və qardaşlıqla ələ alması bölgədəki sülh və dinclik üçün əhəmiyyətlidir. İran və Türkiyə əlaqələri yalnız və yalnız bölgənin sabitlik, dinclik və sülhünə yardımçı ola bilər. Heç kimin də zərərinə deyil. Hər kəs bu əlaqələri bu şəkildə görməlidir. Bu əlaqələrin inkişafı bütün bölgə üçün faydalıdır və bu şəkildə davam edəcəyinə ümidvaram».

Onun sözlərinə görə, İranla Türkiyə arasında ticarət dövriyyəsinin 30 mlrd. dollara çatdırılması mümkün və zəruri bir hədəfdir: «Mən üçüncü ölkələrin İran və Türkiyə xalqlarının faydasına, həmçinin bölgənin sabitliyi və dincliyində böyük əməyi olan iki ölkənin əlaqələrinə qarışmaqdan çəkinəcəklərinə ümid edirəm. Nəticədə, iki ölkə arasındakı əlaqələr daha da inkişaf edər. Türkiyə və İran enerji, nəqliyyat, ticarət, iqtisadiyyat və digər sahələrdə mövcud əlaqələri inkişaf etdirməyə hazır və istəklidir».

M.C.Zərif iki ölkə vətəndaşlarının qarşılıqlı səfərlərini və ölkədə qalmaq şərtlərini asanlaşdıracaq konsulluq əməliyyatlarının inkişaf etdirilməsi mövzusunda da prinsipial razılaşma əldə olunduğunu deyib: «Bu cür səfərlərin İran və Türkiyə arasındakı dost əlaqələri daha da inkişaf etdirəcəyinə inanıram. İki ölkənin mədəniyyət, iqtisadiyyat, ticarət, elm, texnika və digər sahələrdə daha da yaxınlaşmasını təmin edəcək mühit və şərtlər mövcuddur».

İranın XİN rəhbəri vurğulayıb ki, hər iki ölkə bölgədəki problemlərin həll edilməsi, qarşıdurma, müharibə və qardaş qırğınının qarşısının alınması, radikalizmlə mübarizə, bölgə xalqlarının iradəsinə hörmət və bölgə xalqlarının da qəbul edə biləcəyi həll təklifi mövzusunda bir çox sahədə ortaq fikirlərə sahibdir: «Hər iki ölkənin Suriya mövzusundakı fikir ayrılıqlarının daha da azalması üçün müşavirələr davam etdirilir. Bütün Suriya xalqının qəbul edə biləcəyi bir sülh həllinə çatmaq üçün digər ölkələrin də yardımçı olması lazımdır. İran və Türkiyə Suriyada xalqın iradəsi ilə reallaşacaq bir həllə və bu ölkə xalqına humanitar yardım mövzularında kömək göstərə biləcəyinə inanır».

M.C.Zərif görüşdə həmçinin İraqda keçirilməsi planlaşdırılan seçkilərin də əsas müzakirə mövzularından biri olduğunu söyləyib.

Ə.Davudoğlu isə öz növbəsində bildirib ki, Türkiyə ötən ilin noyabrında İranla «altılıq» ölkələri arasında nüvə sahəsində əldə olunmuş razılaşmanı böyük məmnunluq hissi ilə qarşılayıb: «Biz həmişə bölgəmizdə nüvə silahlarından təmizlənilmiş bir bölgə anlayışını irəli sürmüşük. Eyni zamanda, İran kimi dost bir ölkənin dinc məqsədli nüvə proqramından yararlanmasını və dünyanın iqtisadi sisteminə inteqrasiyasını müdafiə etmişik. Üç il əvvəl Tehran razılaşmasını imzalayanda və hazırda da perspektivimiz bu idi. Bundan böyük məmnunluq duyuruq».

Onun sözlərinə görə, iki ölkə arasında ticarət dövriyyəsinin 30 mlrd. dollara çatdırılması planlaşdırılır: «2015-ci ilədək ticarət dövriyyəsini 30, daha sonra 50 mlrd. dollara çatdırmağı düşünürük. Bunun üçün hüquqi infrastrukturun təmin edilməsi istiqamətində atılması lazım olan bütün addımları atacağıq».

Ə.Davudoğlu görüşdə Suriya böhranı və İslam dövlətlərindəki son hadisələrin də əsas müzakirə mövzularından olduğunu vurğulayıb: «İrana səfərim zamanı Suriya mövzusu ilə bağlı fikir mübadiləsi aparmışıq və tərəfləri atəşkəsə çağırmışıq. Ancaq təəssüflər olsun ki, Hələb və bir çox bölgədə yaşanan faciələr, aclıq səbəbindən ölümlərin artması bizləri ciddi şəkildə narahat edir. Ümid edirik ki, dost və qardaş İraqda aprelin 30-da keçiriləcək seçkilər də etnik və məzhəb qarşıdurmaları yaşanmadan dinc başa çatar və tam bir sülh əldə olunar».