Avropa

Ana səhifə

Avropa

Türkiyə parlamentində hökumətin kürd probleminin həlli təşəbbüsü ilə bağlı müzakirələr gərgin keçib - FOTOSESSİYA

Türkiyə parlamentində hökumətin kürd probleminin həlli təşəbbüsü ilə bağlı müzakirələr gərgin keçib - <font color=red>FOTOSESSİYA</font>

13 noyabr 2009 16:58 (UTC +04:00)

APA-nın xəbərinə görə, müzakirələrdə parlamentdə fraksiyaya malik siyasi partiyaların liderləri çıxış edib. Əvvəlcə hökumət adından kürd məsələsi üzrə koordinator olan daxili işlər naziri Bəşir Atalay çıxış edərək atmaq istədikləri bəzi addımlar haqqında ümumi məlumat verib. Sonra etnik kürdlərdən ibarət Demokratik Toplum Partiyasının (DTP) lideri Əhməd Türk, Milliyyətçi Hərəkat Partiyasının (MHP) lideri Dövlət Bağçalı və Cümhuriyyət Xalq Partiyasının (CHP) lideri Dəniz Baykal çıxış ediblər. D. Bağçalı və D. Baykal hökumətə çox sərt ittihamlar ünvanlayıblar. D. Baykalın çıxışının bəzi məqamlarına DTP millət vəkilləri yerdən etiraz səslərini ucaldıblar.

Hakim Ədalət və İnkişaf Partiyasının (AKP) parlament fraksiyası adından söz alan Ömər Çelikin çıxışı isə əvvəldən axıra qədər gərginliklə müşayiət olunub. Onun CHP və MHP haqqında sözləri bu partiyaların millət vəkillərinin etirazlarına səbəb olub. TBMM sədri Mehmet Əli Şahin müxalifətçiləri çətinliklə sakitləşdirib.

Ö. Çelik çıxışa başlayarkən parlamentin tamaşaçı lojasında oturan iki gənc ayağa qalxaraq “Amerika agentlərinin içimizə girməsinə imkan verməyəcəyik!” deyə qışqırıblar. Polis dərhal onları zaldan çıxarıb. Biri oğlan, digəri qız olan gənclərin Türkiyə Gənclik Birliyinin üzvü olduqları müəyyənləşib. Bir qədər sonra isə Şəhid Anaları Dərnəyinin sədri Pakizə Akbaba üzərində gizlətdiyi Türkiyə bayrağını çıxararaq şüar qışqırmağa cəhd edib. Lojadakı mülki geyimli polislər əlləri ilə onun ağzını qapadaraq P. Akbabanı zaldan çıxarıblar. Dərnək sədri “PKK-çıları gətirib danışdırırsınız, bizə imkan vermirsiniz. Gedin, PKK-çıları çıxarın. Susmuram” deyərək polislərə etirazını bildirib.

Ö. Çelikin çıxışından sonra sədr M. Ə. Şahin fasilə elan edib. Fasilədən sonra baş nazir Rəcəb Tayyib Ərdoğan çıxış edərək ittihamlara cavab verib.

Qeyd: Fotolar Türkiyənin “Vatan” qəzetindən götürülüb.

türkiyə_kürd