Avropa

Ana səhifə

Avropa

Tbilisidə Azərbaycan-Almaniya biznes forumu keçirilib

05 noyabr 2010 01:33 (UTC +04:00)

Tbilisi. Nizami Məmmədzadə-APA. Gürcüstan paytaxtında "Almaniya Azərbaycanla görüşür" mövzusunda biznes-forum keçirilib. APA-nın Gürcüstan bürosunun məlumatına görə, tədbirdə Gürcüstanda fəaliyyət göstərən Azərbaycan iş adamlarının ictimai birliyi "AZEBİ" və Almaniya iş adamlarının biznes-assosiyasıyasının üzvləri iştirak ediblər. Tədbirdə Almaniya tərəfdən biznes assosiyasının rəhbərliyi Gürcüstanda ən fəal banklardan biri olan "Prokreditbank" həyata keçirib. Azərbaycan tərəfdən isə "AZEBİ" təşkilatına ARDNŞ-in Gürcüstan nümayəndəliyi başçılıq edib.
Forumda Almaniyanın Gürcüstandakı səfiri Ortvin Xenninq və Azərbaycanın Gürcüstandakı səfiri Namiq Əliyev çıxış ediblər. Səfir O.Xenninq çıxışında qeyd edib ki, "Azərbaycan və Almaniya iqtisadi-siyasi cəhətdən bir-birinə çox yaxın ölkələrdir. Bu gün azərbaycanlılar və almanlar üçün çox vacib bir gündür. Gürcüstanda 2007-ci ildən 48-ə qədər alman şirkətləri bizneslə məşğul olurlar. Biz bundan sonra bu ölkədə şirkətlərimizin sayını daha da artırmağa çalışacağıq. Almaniya Cənubi Qafqazda biznesin inkişafında maraqlıdır. Azərbaycanla Almaniyanın arasında biznes əlaqələri çox səmərəli inkişaf edir. Hər iki ölkə biznesi inkişaf etdirmək üçün tərəfdaşlığı genişləndirir. Almaniya Azərbaycan üçün maşınlar və digər məhsullar ixrac edir. Bakıda Almaniyanın 114 şirkəti qeydiyyatdan keçib. Bu tədbir Azərbaycan-Almaniya iş adamlarının biznes qurmasına daha böyük təkan verəcək və bu biznesin bünövrəsi möhkəm olacaq."
Azərbaycanın Gürcüstandakı səfiri Namiq Əliyev çıxışında bu görüşün Gürcüstanda ilk dəfə keçirildiyini bildirib. "Azərbaycan Almaniya ilə iqtisadiyyat sahəsində əməkdaşlığı həmişə dərinləşdirir və inkişaf etdirir. Azərbaycan biznes sahəsində Gürcüstanın ikinci tərəfdaşıdır. Bu gün 30-a qədər Azərbaycan şirkətləri Gürcüstan bazarında işləyir. Kifayətdir ki, qeyd edək ki, bu gün Azərbaycan iqtisadiyyatı Cənubi Qafqaz iqtisadiyyatının 75 faizini təşkil edir. Bu tədbirin hər iki ölkə arasında əhəmiyyəti böyükdür. Azərbaycan iqtisadiyyatının ınkişaf etməsi Cənubi Qafqaza dünya ictimaiyyətinin marağını daha da çoxaldır. Buna görə də bizim maraqlarımız Almaniyanın iqtisadi maraqları ilə üst-üstə düşür."

Forumda qeyd edilib ki, hər iki ölkə iş adamları və şirkətləri Gürcüstanda fəal çalışırlar. Tədbirdə Gürcüstanda fəaliyyət göstərən Azərbaycan-Almaniya biznes-şirkətləri arasında əməkdaşlığın qurulması, gələcəkdə yeni birgə layihələrin həyata keçirilməsi, yeni investisiya yatırılması və iş yerlərinin yaradılması və biznes fəaliyyətində qarşılıqlı məsələlərin həllinə nail olunması barədə ikitərəfli danışıqlar və məsləhətləşmələr aparılıb. Qeyd olunub ki, Gürcüstan hər iki ölkə üçün strateji tərəfdaş statusuna malik və mühüm önəmli bir ölkədir.

Forumda gələcəkdə "AZEBİ" iş adamlarının ictimai birliyi tərəfindən Gürcüstan, ABŞ və Türkiyə şirkətlərinin Gürcüstandakı assosiasiyalarının birgə tədbirlərinin keçiriləcəyi qeyd olunub. Tədbirdə Gürcüstan hökumətinin nümayəndələri və hər iki ölkənin 55 şirkətinin iş adamları iştirak ediblər.

Azərbaycanın Gürcüstandakı səfiri Namiq Əliyev jurnalistlərə açıqlamasında bildirib ki, Gürcüstan bazarı Azərbaycan üçün çox əhəmiyyətlidir. Burada Azərbaycanın 30-a qədər şirkəti fəaliyyət göstərir. "2009-cu ildə Gürcüstanda ən böyük vergiödəyici ARDNŞ-nin Gürcüstan nümayəndəliyi olub. Bu gün Azərbaycan və Almaniya sahibkarlarının əməkdaşlığı iş adamları üçün qarant olacaq. Müştərək şirkətlərin birgə fəaliyyəti və Avropa şirkətlərinin təcrübələrindən istifadə etməsi Azərbaycan şirkətləri üçün çox vacibdir."

Xatırladaq ki, AZEBİ Gürcüstanda 2009-cu ildən fəaliyyət göstərir və 30-dək Azərbaycan şirkətini birləşdirir. Almaniya Biznes Assosiayası isə Gürcüstanda 2007-ci ildə yaradılıb və bu təşkilatın 48 üzvü var.