Almaniya XİN rəhbəri İsrailə gedib - YENİLƏNİB

Almaniya XİN rəhbəri İsrailə gedib - YENİLƏNİB
# 14 fevral 2024 18:50 (UTC +04:00)


Almaniyanın xarici işlər naziri Annalena Berbok İsraildədir.

APA xəbər verir ki, bu barədə Almaniyanın İsraildəki səfiri "X" hesabında bildirib.

"Oktyabrın 7-dən bəri beşinci dəfə xarici işlər naziri Annalena Berbok HAMAS-a qarşı müharibənin perspektivləri, Qəzzada aktual humanitar vəziyyət və İsrail-Fələstin münaqişəsində gələcək irəliləyiş üçün üfüqlər barədə danışıqlar aparmaq üçün İsrailə gəlib", - o paylaşımında bildirib.

***

10:54

Almaniya xarici işlər naziri Annalena Berbok İsrailə gedir.

APA xəbər verir ki, bu barədə Almaniya Xarici İşlər Nazirliyinin mətbuat xidməti məlumat yayıb.

Bildirilib ki, xarici işlər naziri Berbok fevralın 14-15-də İsraildə səfərdə olacaq.

Bu, oktyabrın 7-dən bəri Almaniya XİN rəhbərinin İsrailə beşinci səfəridir.

“HAMAS-ın terroru təkcə İsrailə deyil, Qəzza xalqına da iztirablar gətirib. Qəzzada humanitar vəziyyət hər saat dramatikləşir. Əgər HAMAS terrorçuları Qəzzada döyüşlərdən əziyyət çəkən fələstinli qadınlara, kişilərə və uşaqlara zərrə qədər mərhəmət göstərsəydilər, dərhal silahlarını yerə qoyardılar. Əksinə, terrorçular dinc əhalinin arxasında gizlənməyə davam edirlər. Qəzza dağılmaq ərəfəsindədir”, - Almaniya xarici işlər naziri Annalena Berbok səfərindən əvvəl açıqlamasında bildirib.

İsrailə səfəri zamanı xarici işlər naziri Berbok siyasi müzakirələr üçün israilli həmkarı İsrael Katz, Baş nazir Benyamin Netanyahu və Prezident İsaak Herzoqla görüşəcək.

“İsrailin öz əhalisinin təhlükəsizliyini HAMAS terrorundan müdafiə etməsi mübahisəsiz mövzudur, ancaq bu müdafiə beynəlxalq humanitar hüquq çərçivəsində baş tutmalı və mülki əhalinin müdafiəsini nəzərdən qaçırmamalıdır.

Rəfahda 1,3 milyon insan çox kiçik bir məkanda dəhşətli şəraitə dözür. Onların bir çoxu İsrailin təxliyə çağırışlarına əməl edərək Qəzzanın şimalındakı döyüş bölgələrini tərk edib – çox vaxt qucaqlarında uşaqları və kürəklərində paltarlarından başqa heç nə olmadan. Bu şəraitdə İsrail ordusunun Rəfaha hücumu humanitar vəziyyəti tamamilə pozacaq. Çünki Rəfahdakı insanlar sadəcə olaraq havada yoxa çıxa bilməzlər. Onların daha çox humanitar yardıma ehtiyacı var. Və onlara atəşkəs lazımdır”, - nazir vurğulayıb.

#
#

ƏMƏLİYYAT İCRA OLUNUR